Қазақстанда зейнетақы жинақтарын заңсыз шешуге қатысқан 42 стоматологиялық клиникаға іс қозғалды. Бұл туралы Қаржылық мониторинг агенттігі хабарлады.
Азаматтардың зейнетақы қаражаты «Бірыңғай жинақтаушы зейнетақы қоры» шотынан жалған медициналық құжаттар арқылы шығарылған. Күдіктілер бұл әрекеттері үшін шешілген қаражаттың 10-20%-ы көлемінде сыйақы алып отырған.
Аталған схемаға 42 клиника қатысып, жалпы сомасы 200 млрд теңгеден астам қаражат заңсыз айналымға түскен. Бұл ақшаға күдіктілер жылжымайтын мүлік сатып алып, үшінші тұлғалардың атына жаңа клиникалар ашқан.
Қазір іс бойынша 11 адам қамауға алынып, тағы үш адам үйқамақта отыр. Жалған медициналық құжат дайындаған дәрігерлерге 30 млн теңге көлемінде төлем жасалған.
2025 жылдың қазанында Атырау қаласының тұрғыны Аслан Дүйсеновке БЖЗҚ-дан ақша аудару үшін жалған клиника ашты деген айып тағылды.
Қыркүйекте Денсаулық министрлігі стоматологиялық қызметтерге біржолғы зейнетақы төлемдерін пайдалануды шектеу жөніндегі бұйрық жобасын «Ашық НҚА» порталына жариялады. Елде зейнетақы шотындағы ақшаны офтольмалогиялық ем алуға және пластикалық ота жасауға қолдануға да тыйым салынды.
Айта кетейік, 2026 жылы зейнетақы жинақтарын мерзімінен бұрын пайдалануға қойылатын ең аз жеткіліктілік шегі 10%-ға көтеріледі.
фото: freepik.com
