Қазақстанда пластикалық операцияларға зейнетақы жинағын пайдалануға шектеу қойылады, деп хабарлады «Отбасы банктің» баспасөз қызметі.
Стоматология мен офтальмологиялық қызметтерге зейнетақы жинағын пайдалануға тыйым салынғаннан кейін қазақстандықтар арасында пластикалық отаға өтінім 130 есе артқан. Банк мәліметінше, бұрын қаражат шешуге айына шамамен 16 өтініш түссе, қыркүйекте олардың саны 123-ке, қазанда 1 844-ке, қарашада 3 878-ге жеткен.
«Отбасы банк» аталмыш өсімді зейнетақы қаражатын мақсатсыз пайдаланудың құралы ретінде танып, пластикалық операциялар бойынша өтінім қабылдауды 2025 жылдың 12 желтоқсанынан бастап тоқтататынын айтты.
Азаматтар зейнетақы қорын сирек ауруларды емдеу, радионуклидтік терапия, радиохирургия немесе протондық терапия сияқты ем түрлеріне, сондай-ақ тұрғын үй алуға қолдана алады. Қазір қазақстандықтар зейнетақы жинақтарын ипотекалық тұрғын үй несиесінің қарызын өтеуге, ай сайынғы төлемді азайтуға немесе несие мерзімін қысқартуға жұмсай алады.
Биыл қыркүйекте Денсаулық сақтау министрлігі стоматологиялық қызметтерге біржолғы зейнетақы төлемдерін пайдалану жөніндегі норманы алып тастауға қатысты бұйрық жобасын дайындады. Артынша «Отбасы банк» платформасы арқылы офтальмологиялық қызметтерге өтініш қабылдау тоқтатылды.
фото: freepik.com
