2025 жылы Батыс Қазақстан облысында 384 бала жоғалған, деп хабарлады Ішкі істер министрлігі. 2024 жылы жоғалған балаларға қатысты 187 өтініш келіп түскен.
Полиция департаментінің дерегіне сәйкес, барлық жағдайда жоғалған балалар бір тәуліктің ішінде табылып, ата-аналарына қайтарылған. Ел бойынша кәмелетке толмағандар Алматы, Ақмола, Батыс Қазақстан, Түркістан және Қарағанды облыстарында жиі жоғалады.
Бас прокуратураның Құқықтық статистика және арнайы есеп комитетінің дерегінше, қазір Қазақстанда із-түссіз жоғалғандар санатында тұрған 1926 адамның 9-ы – кәмелетке толмағандар. Сонымен қатар хабар-ошарсыз кеткен балалар саны 29-ға жеткен.
Ulysmedia.kz редакциясы осы тақырыпта журналистиік зерттеу жүргізіп, Lider.kz еріктілер қозғалысының өкілдерімен сұхбаттасты.
Ұйым өкілдерінің мәліметіне сәйкес, балалардың жоғалуына көбіне отбасындағы қиын жағдай, күйзеліс немесе жолда адасып қалу себеп болады. Сондықтан мамандар бала жоғалған сәттен бастап алғашқы сағаттарды тиімді пайдалану керек екенін айтты.
Ерікті Наталья Чехованың айтуынша, іздеу жұмыстарына кедергі келтіретін негізгі фактор – туыстардың маңызды ақпаратты жасыруы, жалған мәлімет беруі не қоғамның немқұрайлығы. Мамандар күмәнді жағдайда жалғыз жүрген немесе көмекке мұқтаж көрінген баланы байқасаңыз, бейжай қалмауға шақырады.
фото: istockphoto.com
