Жаңалықтар арнасының сюжетіне ұқсатып жасалған фейк видео миллиондаған қаралым жинаған.
Интернетте Euronews телеарнасының жаңалықтар сюжетіне ұқсатып жасалған фейк видео тарап жатыр. Видеода Латвиядағы оқу-жаттығу кезінде Украинадан келген әскери қызметшінің НАТО-ның үш сарбазын атып өлтіріп, кейін өзіне қол жұмсағаны туралы айтылады.
«Шын мәнінде ешқандай атыс болған жоқ, Euronews бұл видеоны түсірген де, жариялаған да емес», — делінген телеарнаның фейкті әшкерелеген материалында.
Латвияның Ұлттық қарулы күштері Euronews атынан тараған фейк сюжет интернетте кең тарағаннан кейін атыс болды деген ақпаратты үзілді-кесілді жоққа шығарды.
2 миллионнан астам қаралым жинаған видео 14 тамызда X әлеуметтік желісінде жарияланған. Онда Euronews логотипі мен дизайн элементтері қолданылып, беделді БАҚ таратқан жаңалық ретінде көрсетілген.
Тарап жатқан фейк видеода бір ғана шынайы факт бар: Латвия астанасы Ригада 3–14 тамыз аралығында НАТО-ның Baltic Trust оқу-жаттығуы өткен. Маневрлер барысында ұшқышсыз ұшу аппараттарын анықтау және оларға қарсы әрекет ету дағдылары пысықталып, тиісті технологиялар сынақтан өткізілді.
Дереккөз Factcheck.kz
