Әлеуметтік желіде Израиль әскері Ирандағы шынайы тікұшақты емес, жерге салынған суретті атқылаған болуы мүмкін деген болжам қызу талқыланып жатыр.
Пікірталас Израиль қорғаныс армиясы (IDF) 4 наурызда X әлеуметтік желісіндегі ресми парақшасында жариялаған видеодан кейін басталды. Бейнежазбада Иран аумағындағы екі нысанға соққы жасалғаны және әскери техника мен ғимараттардың жойылғаны инфрақызыл сәуле арқылы көрсетілген.
«Израиль әскері Иранның әуе техникасын жоюды жалғастырып жатыр», — делінген Х әлеуметтік желісіндегі жазбада.
Желі қолданушыларының айтуынша, кадрларда тікұшақ емес, оның жерге салынған анаморфты бейнесі көрсетілген. Айта кетейік, видеода шабуылдан кейін тікұшақтың пішіні өзгермегенін байқауға болады.
Өзге қолданушылардың пікірінше, жарылыстан кейін шыққан түтін нысанның шынайы әскери техника екенін білдіруі мүмкін.
Иран басылымдары әскер қарсыласын шатастыру үшін тікұшақтың жерге салынған муляжын қолдануы мүмкін екенін жазып жатыр. Ал Израиль әскері әзірге ресми түсініктеме берген жоқ.
Естеріңізге сала кетейік, Таяу Шығыстағы қақтығыс АҚШ пен Израильдің Иранға қарсы шабуылдарынан кейін 28 ақпанда басталды.
Үкім — дәлелденбеген. Қос тараптың Қорғаныс басшылары да зымыранның шынайылығына қатысты ресми мәлімдеме жарияламаған. Айта кетейік, thehive.ai платформасы видеолардың жасанды интеллектінің көмегінсіз жасалғанын көрсетті.
