Елімізде Telegram платформасы заңсыз контентті жедел жою және деструктивті арналарды бұғаттау үшін өз кеңсесін ашады. Бұл жөнінде Цифрлық даму министрлігі хабарлады.
Цифрлық даму, инновациялар және аэроғарыш өнеркәсібі министрі Жаслан Мадиев АҚШ Сауда палатасымен және Meta, Apple сияқты ірі американдық компаниялардың өкілдерімен кездесті. Онда мәліметтер қауіпсіздігі, жалған аккаунттармен күрес және пайдаланушыларды қорғауға қатысты маңызды мәселелер талқыланған.
«Аталған мәселелер қазақстандықтардың цифрлық кеңістіктегі қауіпсіздігін қамтамасыз ету үшін маңызды. Сондай-ақ Telegram платформасымен заңсыз контентті жедел жою және деструктивті арналарды бұғаттау бойынша белсенді түрде ынтымақтастық орнатып жатырмыз. Біздің заңнамаға сәйкес, енді Telegram, WhatsApp және TikTok сияқты интернет-платформалар Қазақстанда өз өкілін тағайындауға міндетті. Telegram-мен олардың өкілін тағайындау және кеңсе ашу туралы келісімге қол жеткіздік. Бұл – контентті бақылауды арттыруға бағытталған маңызды қадам», — деп атап өтті Жаслан Мадиев.
Ресми мәліметке сүйенсек, сондай-ақ министрлік Meta компаниясымен алаяқтық схемаларға қарсы күресті бастап жатыр. Meta өкілдері Қазақстан тап болып отырған интернет-алаяқтық көптеген елдер үшін ортақ проблема екенін атап өткен. Соңғы уақытта Meta жасанды интеллект технологияларын пайдалана отырып, әлем бойынша 1,2 миллиард жалған аккаунтты бұғаттады.
Айтып өтелік, осыған дейін Прокуратура оқырмандарына өз-өзіне қол салуға тапсырма берген Telegram-арнаның бұғатталғаны жөнінде хабарлаған еді. Тексеру барысында әкімшіліктен 67 оқырман суицидке бағытталған рөлдік команда алғаны анықталған.
Сондай-ақ Бас прокурор Берік Асылов кейінгі кезде балалардың өзіне-өзі қол жұмсау дерегі көбейгеніне қатысты пікір білдірді. Әлеуметтік желілер балалардың суицид белсенділігіне әсер ететіндіктен прокурорлардың 15 мың зиян сайт пен сілтемені бұғаттағаны белгілі болды.
Суреттер: министрліктен
