Алматы прокуратурасы оқырмандарына өз-өзіне қол салуға тапсырма берген Telegram-арнаның бұғатталғаны жөнінде хабарлады.
«Тексеру барысында әкімшіліктен 67 оқырман суицидке бағытталған рөлдік команда алғаны анықталып отыр. 23 қыркүйекте сот Алмалы ауданы прокурорының деструктивті чатқа тыйым салу туралы талабын қанағаттандырды. Сот шешімі дереу Мәдениет және ақпарат министрлігіне орындауға жолданды», — деп хабарлады Прокуратурадан.
Алматы прокуратурасы интернетті қолданудың жауаптылығын ата-аналардың есіне салып, күдікті контентті байқағанда құқық қорғау органдарына хабар беру керектігін айтты.
15 мың сайт пен сілтеме бұғатталды
Осыған дейін Бас прокурор Берік Асылов кейінгі кезде балалардың өзіне-өзі қол жұмсау дерегі көбейгеніне қатысты пікір білдірген еді.
«Балалардың өзіне-өзі қол жұмсау толқыны қоғамда резонанс тудырды. Прокурорларға әр факт бойынша тергеуді ерекше бақылауды тапсырдым. Жалпы әлеуметтік желілер балалардың суицид белсенділігіне әсер ететіндіктен прокурорлар 15 мың зиян сайт пен сілтемені бұғаттауға қол жеткізді», — деп жазды «Х» әлеуметтік желісіндегі парақшасында ол.
Сонымен қатар қиын тұрмыстық жағдайдағы отбасылармен жұмыс істеліп жатқанын атап өтті. Мемлекеттік органдармен суицидтің алдын алу бойынша шұғыл шаралар кешені әзірленетінін айтты.
Суицид жасағандардың көбі – 30 жастан асқандар
Ресми мәліметтерде қазіргі уақытта Қазақстанда суицид жасайтындар саны әлдеқайда азайғаны айтылады. Бас прокуратураның Құқықтық статистика және арнайы есепке алу жөніндегі комитетінің дерегі бойынша, биыл қаңтар-шілде аралығында 2,1 мың адам суицид жасаған, бұл былтырмен салыстырғанда 7,2 пайызға аз. Суицид жасағандардың көбі – 30 жастан асқандар болып отыр.
Елде жыл сайын 3,5-4 мың адам суицид жасайды. Бұл бір күнде кемінде 9-10 адам суицид жайлы ойлайды деген сөз.
Қоғамда тұрмыстық зорлықтан зардап шеккен әйелдер мен жасөспірімдер арасында өзіне қол жұмсайтындар көбейген. Ер адамдар арасында да өзіне қол жұмсайтындар бар. Биыл қаңтар-шілде аралығында тіркелген суицидтің 74,9 пайызын ер адамдар жасаған екен.
Жыл сайын әлемде суицид салдарынан шамамен 800 мың адам өмірден өтеді. Бұл дүниежүзінде әр 40 секунд сайын бір адам өз-өзіне қол салады дегенді білдіреді.
Сурет: freepik.com
