Ел назары ауған Талғардағы Шерзат Болаттың қазасынан соң қайғы жамылған отбасының жағдайы ушыға түсті. Марқұмның туыс ағасы Нұрғанат Ғайыпбаев өзіне қол жұмсап, әкесі Қаржаубай Нұрымов пен туыстары 15 күнге қамалды. Әкесіне қатысты «Бөтен мүлікті қасақана жою немесе бүлдіру» бабы бойынша қылмыстық іс қозғалды.
2024 жылы 4 қазанында Алматы облысы Талғар ауданындағы «Қамажай» дүкенінің алдында әкесіне араша түспек болып, кісі қолынан қаза тапқан Шерзаттың өлімінен соң, оның отбасы толық полиция қарауында делінген еді.
Алайда, 9 желтоқсанда Шерзаттың туыс ағасы Нұрғанат Ғайыпбаевтың денесі табылды. Бұл туралы Алматы облыстық полиция департаменті хабарлап, қылмыстық іс қозғалғанын айтты. Полиция департаменті дерегінше, ол өзіне қол жұмсаған. Нұрғанат 4 қазандағы жанжал кезінде інісінің жанында болды және жәбірленушінің бірі еді. Шерзат Болаттың әкесімен тілдескен Азаттық радиосы Нұрымов інісінің «өзіне қол жұмсағанына сенбейтінін, оның өлемін деген ниеті болмағанын» айтады.
10 желтоқсанда полиция Шерзат Болаттың әкесі Қаржаубай Нұрымовты ұстады.
«15:30-да Азат ауылында жерлеу рәсімін өткізу кезінде қоғамдық тәртіп пен айналасындағылардың, оның ішінде кәмелетке толмаған балалардың қауіпсіздігіне қауіп төндірген оқиға орын алды», — деп хабарлады Алматы облысы полиция департаменті.
Хабарламада Н есімді азаматтың айналасындағыларға қауіп төндіріп, өзін агрессивті ұстағаны, суицид жасаймын деп қорқытқаны, полиция қызметкерлеріне пышақпен шабуылдағаны жазылған.
«Азамат Н. жағдайына алаңдаған туыстары мен адвокаттарының өтініші бойынша оның өмірі мен айналасындағылардың өміріне зиян келтірмеу мақсатында полиция қызметкерлері оны ұстау үшін шаралар қабылдады. Азамат Н. ең аз қажеттілік күшпен құрақталды. Қазіргі уақытта ол полиция бөліміне жеткізілді, онымен психологтар жұмыс істеп жатыр» — делінген хабарламада.
Әкімшілік сот шешімен Нұрымов «қоғамдық тәртіпті бұзғаны» және «бұзақылық жасағаны» үшін айыпталып, 15 күнге қамауға алынды. Одан бөлек Шерзат Болаттың әпкесі Бақыт Реймова «халықты митингіге шақырғаны» үшін деген айыппен, ол да 15 тәулікке қамалды. Отбасы адвокаттары сот шешіміне қарсы аппеляциялық шағым түсіретінін айтқан еді. Сондай-ақ қарындасы Салтанат Нұрымоваға айыппұл салды.
Бұдан бөлек, отбасының тағы бір туысы шетел азаматы ретінде Қазақстаннан мәжбүрлі түрде шығарылатын болды.
11 желтоқсанда сот үкімімен Қаржаубай Нұрымовтың Айғазы есімді тағы да бір туысы 15 күнге қамалды. Бұл жайында Шерзат Болат отбасының адвокаттары мәлімдеді.
Ішкі істер министрінің орынбасары Санжар Әділов Шерзат Болаттың оқиғасына қатысты тергеу жыл соңына дейін аяқталатынын журналистерге берген комментарийінде айтты.
«Қылмыстық іс бойынша 11 адам қамауда отыр», — деді ол.
Бүгін, яғни 12 желтоқсанда Шерзат Болаттың әкесі Қаржаубай Нұрымовқа қатысты ҚР ҚК 202-бабы бойынша (Бөтен мүлікті қасақана жою немесе бүлдіру) сотқа дейінгі тергеу басталды. Бұл туралы бірінші адвокат Асқар Қаймақов мәлімдеді. Кейіннен Алматы облысының полициясы да ақпаратты растады.
«10 желтоқсанда азамат Қ. Нұрымов бұзақылық және көлік құралдарының қозғалысына кедергі жасау фактісі бойынша ұсталды. Ол қоғамдық орында және полиция қызметкерлеріне қарсы дөрекі сөз сөйледі, оларды пышақпен қорқытты, сонымен қатар басқа біреудің мүлкіне қасақана зақым келтірді, атап айтқанда, көлікті пышақпен сырып, дөңгелекті тесіп тастады. Іс-әрекетке тоқтамай, айналасындағыларға, оның ішінде кәмелетке толмағандарға қауіп төндіре отырып, қоғамдық тәртіп пен айналасындағылардың тыныштығын бұзды. Бұзақылық фактісі бойынша сот оны 15 тәулікке әкімшілік қамауға алуды тағайындады. Сонымен қатар, полиция бөтеннің мүлкін қасақана бүлдіру фактісі бойынша қылмыстық іс тіркеді», — делінген хабарламада.
Қоғамда резонанс тудырған бұл оқиға ел назарында. Істің әділ қаралуы үшін қоғам белсенділері мен құқық қорғаушылар жағдайды бақылап отыр.
Құқық қорғаушы Айтбек Амангелді «Қаржаубайдың эмоциональдық жағдайын түсінуге болатынын» айтып, әрі қарай аппеляциялық сот шешеді деді.
Естеріңізге сала кетейік, марқұм Шерзат Болаттың қазасынан соң 12 қазанда Талғар маңындағы Азат ауылында Шерзат Болаттың ата-анасы тұратын үйі өртенген еді.
Сурет: Newsroom.kz
