25 тамызда Еуроодақ соты Венгрияның ЕО-ға қарсы жазған арызы бойынша іс қозғады. Венгрия Еуроодақтың бұғатталған ресейлік активтерден түскен табысты Украинаға көмекке бағыттау туралы шешіміне наразы, деп хабарлайды Portfolio.
Будапешт тарапының айтуынша, аталған шешім дауыс беру рәсімін айналып өтіп, елдің вето құқығы ескермей қабылданған.
15 тамызда АҚШ президенті Дональд Трамп пен Ресей президенті Владимир Путин арасында келіссөз өтті. Келіссөз барысында Трамп Ресей “арнайы әскери операция” атайтын қақтығыстың нүктесін қоюға қадам жасады. 18 тамызда Трамп Зеленский мен Путиннің басын қосып, ортақ саммит ұйымдастыруға дайындықты бастағанын мәлімдеді.
Deutsche Welle мәліметінше, Зеленский Путинмен келіссөз тек Еуропаның бейтарап аумағында өтуі керек екенін атап өтті. Ол Швейцария, Австрия немесе Түркия сияқты елдерге баруға қарсы емес.
Украина президенті Владимир Зеленский Венгрия астанасы Будапештті келіссөздер алаңы ретінде «даулы нұсқа» деп атады.
«Мен Венгрияның саясаты Украинаға толық қарсы болды дей алмаймын. Бірақ ол қиын кездеУкраинаға қолдау көрсете алмады», – деді Зеленский.
Венгрияның премьер-министрі Виктор Орбан НАТО-ның ортақ мүддесін атап көрсетіп, ресейлік банктерді SWIFT жүйесінен ажырату және Ресей ұшақтары үшін ЕО әуе кеңістігін жабу жөніндегі шешімдерге кедергі келтірмеді. Венгрия сонымен бірге босқындарды қабылдап, НАТО күштерін өз аумағына орналастыруға келісім берді.
Будапешттің бұл шешімі Мәскеуге қарсы екенін көрсеткендей болды.
2022 жылдың сәуірінде Венгрияның сыртқы істер министрі Петер Сийярто Украинаның елшісін кездесуге шақырды.
«Венгрия жүздеген мың украиналық босқынды қабылдады және жүздеген тонна азық-түлік пен өзге де гуманитарлық көмек жеткізді.
Алайда біз азаматтарымыздың басын қауіпке тіге алмаймыз. Сондықтан Венгрия Ресейге қарсы қару-жарақ жеткізбейді және энергетикалық санкцияларға дауыс бермейді», – деп мәлімдеді ол кездесу барысында.
Мәскеу импорты маңызды
Венгрияның энергетикалық ресурстары тікелей Ресейге тәуелді. Ел билігі Мәскеудің әрекетіне осы себептен де көз жұмып отыр. Үкімет ресейлік энергия ресурстарынан бас тартудың мүмкін еместігін бірнеше рет мәлімдеді.
«Біз энергетика саласында Ресей Федерациясымен стратегиялық ынтымақтастықты жалғастырамыз. Қазір еліміз үшін ең маңыздысы – тариф бағасын әр отбасыға қолжетімді қылу. Ресейлік энерготасымалдаушыларсыз бұл мүмкін емес. Ресейлік компаниялар да бізбен әріптестікті жалғастыруға дайын», – деді сыртқы істер министрі Петер Сийярто.
Оның пікірінше, әзірше Ресейден келетін мұнай мен газға балама жоқ, ал басқа ұсыныстар ел үшін қымбат не сенімсіз.
- 2022 жылдың шілде айы – Петер Сийярто Мәскеуге барып, қосымша газ жеткізу туралы келісім жасасты;
- 2022 жылдың желтоқсан айы – Венгрия ЕО-ның Украинаға 18 млрд еуро көлеміндегі қаржылай көмегін бөгеді;
- 2023 жылдың сәуір айы – Ресейден жеткізілетін газ көлемі артатыны белгілі болды.
Орбанның риторикасы
Премьер-министр «Бұл біздің соғысымыз емес» деп қайталап, қақтығысты тек Киев пен Мәскеудің шешуі тиіс екенін айтып келеді. Оның пікірінше, Батыстың әскери көмегі тек соғысты ұзартады. Виктор Орбан АҚШ-ты бұл даудың басты ойыншысы санап, «бейбітшілік Вашингтон қаласа ғана орнайды» деген пікір айтты.
Киев Будапешттің мұндай саясатын бірнеше рет қатты сынады. Бұл ұстаным Польша тарапынан да теріс қабылданды, Варшава тіпті Орбанға өткір сын айтты.
Қазір Венгрия «екі оттың ортасында» отыр: бір жағынан ел Еуроодақтың қаржылай қолдауына тәуелді, екінші жағынан, Ресейдің арзан энергоресурстарынсыз экономикасы әлсірейді.
фото: ЖИ-генератор
