АҚШ президенті Дональд Трамп Ресей мен Украина басшыларының кездесуін ұйымдастыруға дайындық басталғанын хабарлады. Бұл туралы ол Владимир Зеленский және бірқатар Еуропа елдерінің басшыларымен Ақ үйде өткен келіссөзден кейін айтты.
Бұл саммит АҚШ пен Ресей президенттері Дональд Трамп пен Владимир Путиннің 15 тамызда Аляскада өткен кездесуінен кейін ұйымдастырылды. Зеленский және еуропалық басшылармен келіссөзден соң Трамп Путин мен Зеленскийдің алдағы екі апта ішінде кездесуі тиіс екенін айтты. Оның артынан АҚШ қатысатын үшжақты саммит ұйымдастыру жоспарланып отыр.
Жабық келіссөз кезінде Трамп Зеленскийді НАТО құрамына қосылу мүмкін емес екенін және Қырымды қайтара алмайтынын айтқан. Ал Владимир Зеленский соғыс аяқталған соң елінде сайлау өткізуге дайын екенін мәлімдеді.
Германия канцлері Фридрих Мерц болса, үшжақты кездесуге дейін атысты тоқтатуды жөн көреді.
Қолданбалы этносаяси зерттеулер институтының директоры Талғат Қалиақпаров Sarapshy.info тілшісімен сұхбатта Трамп пен Зеленский арасындағы келіссөздің маңызын түсіндірді.
«Әлемнің ең мықты саясаткерлерінің бірі ретінде Трамп бұл келіссөзді жүргізуді әуел бастан жоспарлады. Жаһандық қарым-қатынасты бақылап отыру да – АҚШ-тың бір ерекшелігі.
Келіссөз кезінде Зеленскийға қысым көрсетілді деп айту қиын. Бұл кездесудің мақсаты – үш жылдан бері жеке сөйлесіп көрмеген Ресей мен Украина басшыларының басын қосу.
Қасым-Жомарт Тоқаев та Путин мен Зеленскийді бейбіт шешімге шақырып жүргені белгілі. Меніңше, Трамп ұйымдастырғысы келетін үш ел арасындағы саммит Қазақстанда өтуі мүмкін. Путин келіссөз үшін кез келген елге бара қоятын адам емес. Осы себептен де кездесу Астана не Алматыда өтуі мүмкін», — деді саясаттанушы.
Естеріңізге сала кетейік, саясаттанушы Ғазиз Әбішев Sarapshy.info порталына берген сұхбатында 15 тамызда өткен Трамп пен Путиннің кездесуі Қазақстанға қалай әсер етуі мүмкін екенін бөлісті.
«Украинадағы соғыс пен Ресейге қарсы санкциялар қазірдің өзінде Қазақстан экономикасына кері әсер етіп жатыр. Ресейдегі инфляция мен стагнация көршілес елде де көрініс табатыны рас. Егер келісім болмаса, бұл үдеріс жалғасады. Ал қысым азайса, Қазақстан санкцияның ықпалынан арылады, бірақ бұл жағдайда мұнай бағасының төмендеуі секілді басқа да қатер туындауы мүмкін», – деді ол.
фото: MANDEL NGAN/AFP via Getty Images
