Алматы іргесінде бой көтеретін Алатау қаласын дамытуға республикалық бюджеттен қаражат бөлінбейді. Бұл туралы премьер-министр Олжас Бектенов Alatau City инфрақұрылымын дамытуға 2025 жылы республикалық бюджеттен қаражат бөлуге қатысты депутаттық сауалға берген жауабында мәлімдеді.
2024 жылы Алматы облысының бюджетінен 183,6 млрд теңге бөлінсе, 2025 жылы аталған бюджет 203,6 млрд теңге көлемінде бекітілді. Өңірдің өз кірісінің атқарылуы 2024 жылы 520,3 млрд теңге болды, бұл болжамды 38,4 млрд теңгеге немесе 108%-ға артты (Ұлттық экономика министрлігінің болжамы – 481,9 млрд теңге).
2025-2027 жылдарға арналған республикалық бюджетте Алматы облысы әкімдігіне 2025 жылы жалпы 79,2 млрд теңге бөлу көзделген. Оның ішінде Алатау қаласында сумен және газбен жабдықтау жүйелерінің құрылысына бағытталған 2 жобаны жүзеге асыру үшін 560,3 млн теңге қарастырылған.
«Сонымен қатар жаңа Бюджет кодексі шеңберінде ең төменгі стандарттар ұғымы енгізілгенін, әлеуметтік, инженерлік-коммуникациялық, көліктік және өзге де инфрақұрылымның ең төменгі стандарттарын (желілерін) ескере отырып, бюджет шығыстарын жоспарлау үшін заңнамалық негіз қаланғанын хабарлаймыз.
Осыған байланысты алдағы уақытта республикалық деңгейде тек аса маңызды және жалпыұлттық маңызы бар жобаларды қаржыландыру жоспарланып отыр, ал барлық базалық инфрақұрылым жергілікті бюджет қаражаты есебінен қаржыландырылатын болады (нысаналы трансферттер ЖАО дербестігін арттыра отырып, ЖБ шығыстарына берілетін болады)», — делінген сауалда.
Осыған дейін вице-премьер Қанат Бозымбаев Алматы облысында салынатын Алатау қаласына Қытай даму институты көмектесетінін айтқан еді. Ол Қытай даму институтының вице-президенті Цзянь Цюй кездесіп, аталмыш қаланың салынуына Қытай даму институтының (China Development Institute) қызығушылығы барын ескертіп, көмектесетінін айтты. Институттың осыған дейін 10 елде АЭА құру бойынша тәжірибесі бар.
Жобаны іске асырушылардың пікірінше, қала республикалық маңызы бар Алматы-Өскемен тасжолының бойында орналасады. Жалпы аумағы 88 мың гектар болатын аймақта қазіргі таңда 53 мың тұрғын, 12 елдімекен бар. Жоба бойынша Алатау қаласына Жетіген ауылы, Талғар ауданындағы Дәулет және Қайрат ауылдары; Іле ауданындағы Жетіген, Еңбек, Жаңаарна, Құйған, Жаңадәуір, Жаңаталап, Ынтымақ, Қоянқұс елдімекендері мен Қонаев әкімшілігіне қарасты Заречное және Арна ауылдары кіреді.
Cурет: primeminister.kz
