Талдықорған қалалық соты «Сарқан ауданы бойынша білім бөлімі» ММ бас бухгалтері К. Құрманғалиева мен оның сыбайластарына үкім шығарды. Бұл туралы Сыбайлас жемқорлыққа қарсы іс-қимыл агенттігі хабарлады.
Құрманғалиева, бухгалтерлер А. Мұратова мен А. Қалабаева, сондай-ақ «Қазпошта» АҚ аудандық учаскесінің бастығы А. Такен 1,6 млрд теңге бюджет қаражатын жымқырғаны үшін кінәлі деп танылды. Олар білім бөлімі қызметкерлерінің шоттарына белгіленген жалақыдан артық қаражат аударған.
Құрманғалиева 8 жылға бас бостандығынан айырылды. Қалабаева, Мұратова мен Такен 7 жылға сотталды.
Сондай-ақ сыбайлас топтың құрамында болған «Айдана» бөбекжай-бақшасы меңгерушісінің м.а. Н. Балғабаева мен Жетісу облысы ІМАБ камералдық бақылау бөлімінің басшысы У. Жапабаевқа 1,2 млн және 1 млн теңге айыппұл салынды.
Сотталғандар мемлекеттік қызмет пен квазимемлекеттік секторда жұмыс істеу құқығынан өмір бойына айырылды.
Сот үкімі заңды күшіне енген жоқ.
Білім беру саласындағы мұндай заңсыз әрекеттер жиі болады. Жыл басында Түркістан облысында Мақтарал ауданы білім беру бөлімі мамандары 2,4 млрд теңгені жымқырғаны туралы Түркістан облысының прокуратурасы хабарлаған болатын.
Сурет: istockphoto.com
