Батыс Қазақстан облысындағы 50 гидротехникалық нысанның 25-і жөндеуді қажет етеді. Бұл туралы облыс әкімінің орынбасары Тілепберген Каюпов хабарлады.
БҚО-да су бөгеттері Жайық өзенінде және оның салаларында, Киров, Бітік, Дөңгелек және Пятимар су қоймаларында орналасқан.
Каюповтың айтуынша, жөндеуді қажет ететін бөгеттердің үшеуінің республикалық маңызы бар, жиырмасы коммуналды қолданыста, ал екеуі жеке кәсіпкерлерге тиесілі.
Аймақта су тасқынының қаупін азайту үшін 18 қорғаныс бөгетін қалпына келтіру жұмыстары басталған. Қорғаныс құрылымдарының ұзындығы 37,1 шақырымды құрайды.
Айта кетейік, 2024 жылғы су тасқынынан кейін Орал қаласы мен Қаратөбе ауданының әкімдеріне сөгіс жарияланып, бірқатар басқарма басшыларына ескерту берілді.
Күні бүгін төтенше жағдайлар департаментінің бастығы Руслан Қасыбаев БҚО Сырым ауданына жұмыс сапарымен барып, көктемгі су тасқынының салдарын болдырмау үшін қабылданып жатқан шараларға мониторинг жүргізді.
фото: freepik.com
