БҚО-ның кей аудандары көктемгі су тасқынына дайын емес. Орал қаласы мен Қаратөбе ауданының әкімдеріне сөгіс жарияланып, бірқатар басқарма басшыларына ескерту берілді. Олардың су тасқынына дайындық жұмыстарында олқылықтар анықталған.
Өңірде су тасқыны қаупі жоғары болғанымен, тиісті шаралар уақытында атқарылмаған. Орал қаласында өзен жағалауындағы бөгеттердің құрылысы аяқталмаған, кейбірі тіпті басталмаған. Ал соңғы екі жыл қатарынан ауылдарды су басу қаупі жоғары Қаратөбе ауданында өзен жағалауы әлі де бекітілмеген, су бұру каналдары жөнделмеген.
Тексеру нәтижесінде барлық 102 гидротехникалық нысанның тек 36-сы ғана мемлекет меншігіне алынғаны белгілі болды. Бұл тапсырманы орындамаған облыстық табиғи ресурстар және табиғат пайдалануды реттеу басқармасының басшысына ескерту берілді. Сонымен қатар облыстық төтенше жағдайлар департаментінің мұз жару іс-шараларына қатысты конкурсты әлі жарияламағаны анықталды.
Қазіргі уақытта БҚО-да Орал қаласы мен 9 ауданда су тасу қаупі сақталып отыр.
Ресейдің кей облысында жылымық басталды
Бұқаралық ақпарат құралдарының жазуынша, көршілес жатқан Ресейде қазірдің өзінде судың шамадан тыс деңгейден көтерілуі байқалған. Ресейдегі қысқы су тасқыны рекордтық көрсеткішке жетіп, өзендер әдеттегіден үш ай бұрын арнасынан асып жатыр. Орынбор облысындағы Жайық өзенінің су деңгейі бір тәулікте 13 см-ге көтерілді. Билік 2025 жылдың басында су деңгейінің күрт көтерілуіне жол бермеу үшін Ириклин су торабы арқылы суды ағызып жатқанын мәлімдеуде.
Мамандар Есіл, Ертіс және Орал өзендерінің негізгі бассейндеріндегі қардағы ылғал мөлшерін бақылауда ұстайды. Бұған дейін Ресейдің төтенше жағдайлар министрі Қорған, Түмен және Мурманск облыстарында көктемгі су тасқынының қаупі артып отырғанын атап өтті. Шекаралас Алтай өңірінде де су деңгейінің көтерілу ықтималдығы жоғары.
Сурет: gov.kz
