Санитариялық-эпидемиологиялық бақылау департаментінің басшысы Динара Жанабергенованың мәліметі бойынша БҚО-да 25 тұрғынға қызылша диагнозы қойылған.
Аурудың алдын алу үшін 1 және 6 жастағы балаларды қызылша, қызамық және эпидемиялық паротитке қарсы профилактикалық екпелермен қамту деңгейін арттыру және вакцинадан бас тартқандарға түсіндіру жұмыстарын жүргізу жоспарланған.
Көршілес Ақтөбе облысында соңғы айда 88 адам қызылша жұқтырған, олардың ішінде 74 бала бар. Қостанай облысында 58 жағдай тіркелді. БҚО әкімдігінде қызылшаның таралуының алдын алу мәселесі бойынша штаб отырысы өтті.
Қаңтар айының соңында Ақмола облысының Щучинск қаласындағы кадет корпусында 71 курсант вирус жұқтырып ауруханаға түсті. Олардың арасынан 24 жасөспірім қызылша жұқтырған.
Айта кетейік, 2 ақпанда Санитарлық-эпидемиологиялық бақылау комитетінің орынбасары Марал Рахымжанова балалар арасында инфекциялық аурулардың өскенін хабарлады. Қаңтардан бастап Астанада 403 адам вирус жұқтырған. Олардың 28%-ы 1 жасқа толмаған сәбилер болса, 60%-ы 1-4 жас аралығындағы балалар.
фото: freepik.com
