Маңғыстау облысында заңсыз құмар ойынды ұйымдастырған қылмыстық топ ұсталды. Бұл туралы Қаржы мониторингі агенттігінің облыстық департаменті хабарлады.
Департаменттің мәліметінше, топ 2022-2023 жылдары компьютер залы ретінде тіркеліп, банк аударымдарымен ақша қабылдаған. Ойынға қатысушылар арнайы сайт арқылы тіркелген.
Осы уақыт аралығында топтың жалпы табысы 77 млн теңгеден асқан.
«Қаржылық тергеу барысында күдіктілер заңсыз жолмен табылған қаражатқа 36 млн теңгеге екі автокөлік – «Toyota Land Cruiser» және «Mersedes-Benz 320» сатып алғаны анықталды», — деп хабарлады агенттік.
Сот күдіктілерді заңсыз құмар ойын ұйымдастыру және қылмыстық топ құру бойынша кінәлі деп танып, 5-тен 8 жылға дейін бас бостандығынан айырды. Автокөліктер мемлекет пайдасына тәркіленді.
Дәл осындай оқиға 2024 жылы Қарағандыда тіркелді. Күдікті «Покер» құмар ойынын өткізу үшін жергілікті мейрамханада үй-жайды жалға алып, арнайы ойын үстелдерін орнатып, ойын фишкалары мен карталарын сатып алған. Банк шотына 32 миллион теңгеден астам қаражат түскен.
Бұған дейін ҚМА елдің бірнеше облысында жұмыс істеген заңсыз онлайн ойын бизнесін ұйымдастырғандарды Солтүстік Қазақстан облысында анықтаған еді. 100 мың теңгеге дейінгі ставкалары бар покер ойындары «Club GG» жалпыға қолжетімді қосымшасында мыңдаған аудиторияны тарта отырып, 40-тан астам ойын үстелдерін өткізген. 2024 жылы қатысушылардың банктік шоттарына түскен табыс 55 млн теңгеден, қатысушылардың саны 4 мыңнан асқан.
Жыл басында Президент Қасым-Жомарт Тоқаевпен кездескен ҚМА төрағасы Жанат Элиманов агенттік 2024 жылы 1312 қылмыстық істі тергеп, одан 236,8 миллиард теңге заңсыз айналымда жүргенін анықтағанын айтқан еді.
Одан бөлек 42 қаржы пирадасы жойылып, алаяқтық схемаларды жарнамалайтын 15 мыңға жуық сайт пен аккаунт бұғатталған.
«Мессенджерлердегі 327 чат жабылған. Әлеуметтік желілердегі 41 онлайн құмар ойын алаңы, астыртын жұмыс істейтін 30 ойын залы, казино мен букмекерлік кеңсе әшкереленіп, 11,7 мыңнан астам онлайн-казино сайтына кіруге тосқауыл қойылды. Агенттік қызметкерлері 120 млрд теңге көлеміндегі негізсіз бюджет шығындарының алдын алып, заңсыз крипто алмастырушы арқылы қылмыстық кірістерді заңдастыруға ниеттенген 36 әрекеттің жолын кесті», — деді төраға.
2024 жылдың 9 қыркүйегінен бастап Қазақстанда букмекерлік кеңселер мен дүкендердің сыртқы жарнамасына заңмен тыйым салына бастады.
Сурет: Ашық дереккөздерден
