АҚШ-тан мигранттардың алғашқы легі Коста-Рикаға депортацияланды. Оның ішінде Орта Азия елдері азаматтары бар. Бұл туралы Reuters хабарлады.
АҚШ-тан 200 шетелдік мигрант депортацияланды. Агенттіктің мәліметінше, мигранттардың ішінде Өзбекстан, Қазақстан, Ауғанстан, Әзербайжан, Армения, Ресей, Грузия, Түркия, Қытай, Вьетнам, Иран, Иордания және Гана азаматтары бар.
Отандық басылымдардың хабарлауынша, Қазақстан азаматтарының саны үшеу.
Одан бөлек топта кішкентай балалар мен жүкті әйелдер, отбасылар бар. Коста-Рика мигранттарды уақытша қабылдайды. Мигранттар Сан-Диего қаласынан Коста-Риканың астанасы Сан-Хосеге келіп, ол жақтан автобуспен Панама шекарасына жақын орналасқан мигранттар орталығына жеткізілетіні жазылған.
Коста-Рика мигранттарға елде бір айға дейін тұруға рұқсат береді. Осы уақыт аралығында жергілікті билік олардың елдеріне қайтуын ерікті түрде ұйымдастырады.
«Олардың көпшілігі өз елдеріне қайтуды қалайды», – деді Коста-Риканың қауіпсіздік министрлігінің орынбасары Омер Бадилья.
Бұл келісім АҚШ-тың заңсыз миграцияға қарсы жүргізіп жатқан саясаты шеңберінде іске асып жатыр. Дональд Трамп өзінің сайлауалды бағдарламасында заңсыз еңбек етіп жүрген мигранттарды елден шығаратынын мәлімдеген еді. Осыған дейін АҚШ–тағы Қазақстан елшілігі Қазақстан азаматтарына Америкадағы миграция саясатының қатаңдағанын және өз еріктерімен шекарадан шығып кетуді ескерткен.
Сурет: shutterstock
