Мемлекеттік ақпараттық тапсырыс көлемі бір жылда шамамен 85 млрд теңгеге жетті, деп мәлімдеді «Құқықтық медиа-орталық» қоғамдық қорының басшысы Диана Окремова.
Мәдениет және ақпарат министрлігі ақпараттық саясатқа 67 млрд теңге, Президент істері басқармасы 12 млрд теңге, өңірлік бюджеттен 5 млрд теңге және Сыртқы істер министрлігінен 1,5 млрд теңге бөлінген.
Диана Окремова басты мәселе бөлінген қаржы көлемінде емес, оның тиімділігін бағалайтын нақты жүйенің жоқтығында екенін атап өтті. Оның сөзінше, министрлікке бұл саясаттың нәтижесі туралы жыл сайын сұрақ қойылғанымен, ешкім нақты жауап бере алмайды.
«Мемлекеттік тапсырыстың қалай жұмыс істеп жатқаны үшін бірыңғай медиаплатформа ашу туралы уәде берілді. Бұл бастама бір жыл ішінде орындалуға тиіс еді», — деді Диана Окремова.
Өткен жылы мемлекеттік ақпараттық тапсырысқа 62,8 млрд теңге бөлінді. Оның 60,5 млрд теңгесі мерзімді басылымдар, ақпарат сайттары және телевизияда материал шығаруға жұмсалған.
фото: istockphoto.com
