Қарағанды қаласында Jetour және Geely компаниялары қызметінде заңбұзушылық анықталды. Бұл жөнінде Бәсекелестікті қорғау және дамыту агенттігі хабарлады.
Аталған агенттіктің Қарағанды облысындағы департаменті тексеріс жүргізген. Тұтынушылар ресми дилерлердің талабы заңсыз екенін айтып, департаментке шағымданған.
Белгілі болғаны, «KRG AUTO» ЖШС (Jetour ресми дилері), «Autocity Karaganda» ЖШС (Geely ресми дилері) сатып алу-сату шарттарында компаниясы мүдделеріне басымдық берілген. Шарттарда белгілі бір сервистік орталықтарда ғана автокөліктерге техникалық қызмет көрсетілетіні жазылған.
«Шарт орындалмаған жағдайда кепілдік міндеттемелері тоқтатылатын болған. Мұндай келісімшарт талаптары тұтынушылардың құқықтарын шектейді. Сатудан кейінгі қызмет көрсету нарығындағы бәсекелестікке кедергілер туғызады. Анықталған бұзушылықты жою және тоқтату мақсатында департамент тиісті компанияларға хабарлама жолдады. Екі компания да көрсетілген нұсқамаларды белгіленген мерзімде орындады», — деп хабарлады агенттік.
Мұндай заңсыздық Орал қаласында да анықталған еді. «G Motors Uralsk» ЖШС, яки Geely ресми дистрибьюторының заңсыз әрекеті жөнінде тұтынушылар шағымданған.
Еске салсақ, осыған дейін Бәсекелестікті қорғау және дамыту агенттігі Қазақстандағы 11 әуежайға қатысты тергеп-тексеру бастағанын жазған едік. Себебі әуе керосиннің көтерме және бөлшек сауда нарығына жүргізген талдау нәтижесінде отын құнының негізсіз өсуі анықталды.
Сондай-ақ Ақтөбе қаласының мамандандырылған ауданаралық әкімшілік құқықбұзушылықтар жөніндегі соты «СНПС Ақтөбемұнайгаз» акционерлік қоғамын бәсекелестік туралы заңнама талаптарын бұзғаны үшін айыпты деп таныды. Бұл шешімнің негізі Ақтөбе облысы бойынша Бәсекелестікті қорғау және дамыту агенттігінің департаменті жүргізген тергеп-тексерудің нәтижелері болды.
Фото: Freepik.com
