Бәсекелестікті қорғау және дамыту агенттігі «G Motors Uralsk» ЖШС-ның шартынан заңбұзушылықты анықтады.
Агенттік мәліметі бойынша Geely ресми дистрибьюторының заңсыз әрекеті жөнінде тұтынушылар шағымданған. Автосалон сатып алу-сату шартында «G Motors Uralsk» ЖШС-на тиесілі ресми дилерлік сервис орталықтарына баруды міндеттеген. Яғни шарт бойынша кепілдік мерзімі ішінде сервис орталығы ғана техникалық қызмет көрсетуі тиіс. Егер компания талабы орындалмаса, көлікті жөндеуден бас тартқан.
«Департамент тарапынан «G Motors Uralsk» ЖШС-на анықталған бұзушылықтарды жою және оларды тоқтату қажеттігі туралы хабарлама жолданды. Қазіргі уақытта хабарлама толық орындалды, шарттар бәсекелестікті қорғау саласындағы қолданыстағы заңнамаға сәйкестендірілді», — деп хабарлады агенттік.
Бұған дейін Бәсекелестікті қорғау және дамыту агенттігінің Батыс Қазақстан облысының департаментінің басшысы С. Уахитов өңір тұрғындарының шағымына сай дилерлік орталық қызметі тексеріліп жатқанын хабарлаған еді.
G Motors Uralsk Geely автокөліктерін сатумен шұғылданады. Автосалон 2023 жылы іске қосылған. Компания басшысы — Артем Пащенко.
фото: kolesa.kz
