Бүгін Ұлттық банк төрағасы Тимур Сүлейменов теңге бағамын қолдау үшін ішкі нарыққа доллар сату қалай ұйымдастырылып жатқанын айтты.
«Қыркүйекте теңгенің айырбастау бағамы 1 доллар үшін 481,11 теңгеге дейін, яғни 0,1%-ке аздап нығайды. Алайда жылдың басынан бері 5,8%-ке әлсіреді», — деді Ұлттық банк басшысы.
Оның сөзінше, трансферттерді қамтамасыз ету үшін қыркүйекте Ұлттық қордан республикалық бюджетке 945 млн доллар валюта сату теңгеге қолдау көрсетті.
«Сондай-ақ, Ұлттық банктің «Қазатомөнеркәсіп» АҚ акцияларын сатып алуының валюта нарығына ықтимал теріс әсерін теңестіру аясында 241,5 млн АҚШ долларын саттық», — дейді Тимур Сүлейменов.
Сонымен қатар ол бірыңғай жинақтаушы зейнетақы қорының зейнетақы активтерін инвестициялау үшін млн доллар сатып алынғанын айтады.
«Зейнетақы активтерінің валюталық үлесі мақсатты 40% деңгейіне жетуіне байланысты шетел валютасын сатып алуды тоқтата тұру туралы шешім қабылданды. Теңгенің бұдан кейінгі динамикасы нарыққа қатысушылардың күтулеріне, әлемдік нарықтардағы жағдайға және геосаяси жағдайдың өзгеруіне байланысты болады. Ұлттық банк теңгерімсіздікті болдырмайтын және алтын-валюта резервтерінің сақталуын қамтамасыз ететін икемді бағам белгілеу режимін ұстанады», — деді ол.
Айтып өтелік, Ұлттық банктің ресми сайтында көрсетілгендей, 15 қазанда доллар 484,11 теңгеге тең болып тұр. Соңғы аптада көрсеткіш 490 теңгеге дейін жетті.
Осыған дейін доллар бағамы 2022 жылдың наурызынан бергі ең жоғарғы деңгейге дейін жеткенін жазған едік. Соңғы айларда доллар 480 теңге, яғни шартты түрдегі межесінен жиі асатын болған.
Naryk.kz мәліметінше, сарапшылар жыл соңына дейін доллар 464 теңгеге дейін түсетінін айтады.
Ұлттық Банктің бұйрығымен жүргізілген кезекті сарапшылар сауалнамасының нәтижесінде, тамыз айындағы зерттеумен салыстырғанда ұлттық валюта 2024 жылдың соңына қарай 464 теңге/$1 (бұрын 461,2 теңге болған) нығаяды деп болжанып отыр.
Сурет: pixabay.com
