Қазақстанда пайдалы қазбаларға бай жер қойнауын тиімді пайдалану ісінде әлі де көптеген олқылықтар табылды. Бұл туралы жоғары аудиторлық палатаның отырысында айтылды.
Қазақстанның жалпы ішкі өнімінің 20%-дан астамын пайдалы қазбалар қамтамасыз етіп отыр. Ел аумағында темір кені, мырыш, уран, мыс, алтын және күміс секілді жерасты байлықтары ірі көлемде шоғырланған.
Мемлекеттік аудит геологиялық барлау мен жер қойнауын пайдалануға жауапты уәкілетті органдардың қызметінде 81 рәсімдік бұзушылық пен 16 жүйелі кемшілікті анықтаған.
Сарапшылардың айтуынша, салада расталмаған «қағаз жүзіндегі» қорлардың үлесі жоғары. Бұған геологиялық зерттеулерге жеткілікті қаржы бөлінбеуі және жер қойнауын пайдаланушылардың инвестициялық белсенділігінің төмендігі себеп болып отыр.
Естеріңізге сала кетейік, осыдан бір жыл бұрын Ұлытауда марганецтің заңсыз өндіріліп жатқаны анықталды. Күдіктінің үстінен іс қозғалып, сот үкімі оны 6 жыл 8 айға бас бостандығынан айырды.
Тексеріс барысында геология комитетінің тарапынан бақылаудың болмауы салдарынан орындалмаған цифрландыру жұмыстары үшін мемлекет есебінен 68,2 млн теңге төленгені анықталды.
Сонымен қатар, зертханалық инфрақұрылымның әлсіздігі мен геологиялық ақпаратты цифрландырудың аяқталмауы саланы халықаралық стандарттарға сай дамытуға кедергі келтіріп отыр.
фото: freepik.com
