12 қараша күні кеште Маңғыстау облысы Жаңаөзен қаласындағы «Өзенмұнайгаз» АҚ-ға қарасты «Бұрғылау жұмыстары басқармасы» компаниясының жұмысшылары ереуілге шықты. «Азаттық радиосының» жазуынша, бір апта өткеніне қарамастан жұмысшылар талабы орындалмады және ереуілшілер әлі тарқаған жоқ.
Жұмысшылар басшылыққа бес түрлі талап қойып отыр:
- ӨМГ зейнеткерлері мен денсаулығынан айырылған мұнайшылардың балаларын тікелей штатқа орналастыру, 55-58 жастан жұмысқа жарамсыз қызметкерлерге 300 (АЕК) зейнетке өз еркімен шыққан жағдайда төленсін.
- Жаңаөзен қаласында жұмыссыздық мәселесін шешу, 1000 орындық База УОС-5 жанындағы мекемені қайта қарап іске қосу.
- Тұңғыш президенттің үздік көрсеткішке ие болған Ұжымдық шарттағы 2013 жылғы қолданыста болған 5.19 бабын орнына қою, дербес еңбекақы төлеу жүйесіне өту.
- СЖЖ және СКЖ машинистерін және оператордың дәрежесін 6-7 дәрежеге көтеру және екінші көмекші қосу.
- 30% қосымша жалақы тәртібін төлеуді ұжымдық шартқа енгізу.
«Өзенмұнайгаз» АҚ бас директоры Жанболат Саймағанбетовтың жауабы қандай?
Сол күні «Өзенмұнайгаз» бас директоры Жанболат Саймағанбетов жұмысшылар қойып отырған негізгі 5 талапқа қатысты Еділов телеграм арнасында жауап берді.
Жауапта бірінші талаптың орынсыз әрі негізсіз екенін айтады. Жаңаөзен қаласы бойынша жұмыссыздар және зейнеткерлердің балалары 50 ге 50 пропорция арқылы қабылданады. Егер тек зейнеткерлердің баласы жұмысқа қабылданса, қаладағы өзге жұмыссыз адамдарға мүмкіндік берілмейді дейді.
“Өзенмұнайгаз” АҚ ұжымдық шартында әйелдерге 55 жастан, ерлерге 58 жастан зейнет алды демалысқа өз еркімен шығу мүмкіндігі қарастырылған, сонымен қатар ол жұмыскерлерге 300 АЕК емес, еңбек өтіліне сәйкес 15 000 000 — 20 000 000 теңге көлемінде төлем қарастырылған және отбасының бір мүшесін тіркеуге мүмкіндігі бар,” — деп көрсетілген бас директордың жауабында.
Екінші талап бойынша База УОС-5 жанындағы жобаны жалғастыру тиімсіз екені анықталып, тоқтатылғаны және оның қаладағы жұмыс мәселесін шешпейтіні айтылған.
Үшінші талап бойынша 2013 жылы қолданыста болған ұжымдық шарттың 5.19-бабына 2017 жылы өзгертулер енгізілген. Жеке табыс салығы мен міндетті зейнетақы төлемдері бұрынғыша жалғаса беретіні көрсетілген.
Төртінші талап бойынша машинистер мен операторларға еңбекақы нақты жұмыс уақытына төленетінін, барлық бригада қажетті құраммен толық қамтылған дейді.
Бесінші талап бойынша қосымша ақы төлеу тәртібі арнайы әдістеме негізінде жұмыс істеп тұр.
Компанияның бас директоры Саймағанбетов жұмысшылардың талабына ешқандай негіз жоқ әрі орынсыз деп бағалайды. Ал жұмысшылар бұл жауаптарға қанағаттанбайтынын, Астана қаласынан «ҚазМұнайГаз» ҰК» АҚ-ның басшылары келіп, құжат жүзінде негіздеуін талап етіп отыр.
«Өзенмұнайгаз» — елдегі ірі кен орындарды игеруші компания. 60 жыл болған Маңғыстау облысындағы Өзен және Қарамандыбас мұнай кен орындарын игерумен айналысатын мұнай компаниясы, құрамында 16 өндірістік бөлімше бар.
Ереуілшілер талабы редакция назарында болады.
Сурет: ozen.kz
