Алматы қаласының прокуратурасы мен Yandex Qazaqstan алимент төлеуден жалтару фактілеріне қарсы күрес және бала құқықтарын қорғау мақсатында ынтымақтастық туралы меморандумға қол қойды. Бұл туралы қалалық прокуратураның баспасөз қызметі хабарлады.
Меморандум аясында тараптар заңды ақпараттық өзара іс-қимылды жолға қойып, мәліметтермен жедел алмасуды, сондай-ақ кірісті жасыру және алимент бойынша қарыздың жиналу фактілерін анықтауды көздейді. Құжатқа Алматы қаласының прокуроры Серік Кәріпбеков пен Yandex Qazaqstan басшысы Тимур Шәлекенов қол қойған.
«Кейбір алимент төлеушілер ресми түрде жұмыссыз ретінде тіркелсе де, «Яндекс.Такси» секілді платформаларарқылы табыс табуы мүмкін», — деді прокурор.
Прокуратура дерегінше, өткен жылы Алматыда алимент төлеуден жалтарған 110 азамат анықталып, 57 адамға әкімшілік жаза қолданылған, ал 10 жағдай бойынша сотқа дейінгі тергеп-тексеру басталған.
Айта кетейік, Қазақстандағы такси нарығы жыл сайын шамамен 15-20%-ға өсіп келеді.
фото: freepik.com
