TikTok компаниясының Орталық Азия бойынша мемлекеттік органдар жөніндегі директоры Сергей Соколов платформаның Қазақстандағы бизнестің дамуына әсерін бағалау жөніндегі зерттеу нәтижелерін таныстырды. Бұл туралы Ұлттық экономика министрлігі хабарлады.
Зерттеу Қазақстандағы цифрлық платформалардың шағын және микро бизнеске әсерін бағалауға арналған. Сауалнамаға елдің 20 өңірінен 300-ден астам кәсіпкер қатысты.
«Атамекен» президиумының төрағасы Райымбек Баталовтың айтуынша, TikTok-пен әріптестік бизнеске нақты нәтижелер беріп жатыр.
«Апта сайын контент жариялайтын әр сегізінші компания табысының жартысынан астамын дәл осы платформадан табады. Ал жалпы 63% кәсіпорын жылдық табысының кем дегенде 5%-ы TikTok арқылы қалыптасатынын айтты», – деді ол.
Зерттеу қорытындысы бойынша, белсенді жұмыс істейтін компаниялардың 63%-ының жылдық табысының кем дегенде 5%-ы TikTok платформасының арқасында жүзеге асып отыр.
Бұған дейін Қазақстан премьер-министрі Олжас Бектенов TikTok платформасын бұғаттауға қарсы шықты. Оның орнына билік контентті модерациялауды күшейтуді жоспарлап отыр.
Сергей Соколов Қазақстанды аймақтағы ең қарқынды дамып келе жатқан нарықтардың бірі деп атады. Оның сөзінше, TikTok әлеуеті елде әлі толық ашылған жоқ, сондықтан компания мемлекеттік органдармен және «Атамекенмен» бірлесе отырып, бизнесті цифрландыру деңгейін арттыруға дайын.
