12 тамызда іздестіру жұмыстары кезінде EC-145 тікұшағы экипажының үшінші мүшесі капитан Аман Амангелдінің денесі табылды. Бұл туралы қорғаныс министрлігі хабарлады.
10 тамызда іздеу тобы экипаж командирі, майор Нұржігіт Үйсінбаевты тапты. Ол әскериавиация командирінің тәрбие және идеологиялық жұмыс жөніндегі орынбасары қызметін атқарған. Ұшқыштың жалпы ұшу уақыты – 930 сағат.
11 тамызда авиациялық эскадрилья буынының борт технигі, капитан Бақтияр Ержігітовтің денесі табылды. Оның EC-145 тікұшағындағы жалпы ұшу уақыты 300 сағатты құрады.
Үш ұшқыш та Әуе қорғанысы күштері әскери институтының түлектері.
Апаттың себептерін анықтау үшін тергеу амалдары басталған.
Акватория мен оған іргелес аумақты зерттеу әлі аяқталмады. Іздестіру жұмыстары тікұшақ бөліктерін табу үшін жүргізіліп жатыр.
Қорғаныс министрлігі мен Қарулы күштер басшылығы марқұмдардың туыстарына көңіл айтып, барлық қажетті көмек көрсетілетінін мәлімдеді.
Естеріңізге сала кетейік, 25 шілде Алматы облысындағы Отар ауылының тұсында EC-145 әскери тікұшағы радардан жоғалып кетті. Іздестіру жұмыстары 18 күнге жалғасты. Мамандар Сорбұлақ су қоймасын бірнеше секторға бөліп, 13 жүзу құралы мен көлдің түбін шолуға арналған арнайы техниканы іске қосты.
фото: istockphoto.com
