Жыл басынан бері Қаржылық мониторинг агенттігі қаржы пирамидаларын құру және басқару фактілері бойынша 57 қылмыстық істі тергеген. Алаяқтық схемаларға 21,5 мыңға жуық салымшы тартылған. Шығын – 20 млрд теңгеге жуық.
Қазір 12 млрд теңгеден астам қаражат өтеліп отыр.
Агенттікте алаяқтық жобалардың циклін және оларға тартылған салымшылар санын қысқартуға бағытталған «Қаржы пирамидаларына қарсы іс-қимыл» арнайы жобасы енгізілген.
«Жақында Алматыда «HitBeatMusic» қаржы пирамидасын құру және басқару фактісі бойынша сотқа дейінгі тергеу аяқталды. Алаяқтар өздерін канадалық компанияның акционері және иесі ретінде таныстырып, музыкалық инвестициялық жоба қызметіне іс жүзінде қатысы жоқ компанияның акцияларын сатумен айналысқан.
Осылайша, салымшылардың қаражатын тартып, енгізілген соманың 10-нан 15%-на дейін пайдасын уәде етеді. Келтірілген залал сомасы 255 млн теңгені құрады. Сот үкімімен аталған адамдар кінәлі деп танылып, 5 жылдан 6 жылға дейінгі мерзімге бас бостандығынан айырылды», — деп жазды агенттік.
Сондай-ақ IT-құралдарды пайдалана отырып, әлеуметтік желілерге талдау жасалған. Биыл қаржы пирамидаларының белгілері бар 10,5 мыңнан аса сайт сілтемесі бұғатталды. WhatsApp, Telegram және Instagram-да 292 чатқа тосқауыл қойылған.
«Қазірге дейін «Qnet», «World Business Consulting», «Finiko» «Antares»/«Antares Trade», «Sincere Systems Group»/«S-Group», «Hermes LTD», «Life is good», «Chia Tai Tianding»/«Chia Tai Pharmaceutical» «Energy Eolus Oazqstan»/«Eolus» сияқты елде жұмыс істейтін қаржы пирамидаларының құрылымдық бөлімшелерінің ұйымдастырушылары жауапкершілікке тартылды. ҚМА адам ақша салғысы келетін компанияны қаржы пирамидасының белгілеріне тексеруге мүмкіндік беретін Telegram-ботты іске қосты. Сонымен қатар мұндай құқық бұзушылықтар үшін ұсталған барлық жалған жобалардың тізімі aгенттіктің сайтында жарияланған. Ел азаматтарын күмәнді және алаяқтық схемалардан қорғау бойынша жүйелі жұмыс жалғасады», — делінген ҚМА хабарламасында.
Қаржы пирамидасы Қазақстанға 1993 жылы келді. Жыл сайын қазақстандықтар қаржы пирамидасын құрған адамдарға миллиардтаған теңгені өз қолымен «жинап беретіні» шын.
Статистикалық мәліметтерге жүгінсек, жыл сайын 100-ге жуық қаржы пирамидасы ашылады екен.
Ресми деректерде, елімізде 2022 жылы 892 адам қаржылық пирамидасының құрбаны болса, 2023 жылдың тоғыз айында жәбірленушілер саны – 2 079 адамды құраған.
Сурет: freepik.com
