Перизат Қайрат және анасы Ғайни Алашбаева қайырымдылық қорынан аса ірі көлемде ақша жымқырды деп танылып, сот үкімімен сәйкесінше 10 және 7 жылға бас бостандығынан айырылды.
Бұл туралы Астана қаласының қылмыстық істер жөніндегі ауданаралық сотында судья Сабыржан Кәрімов хабарлады.
Сот Перизатты Қайратты ҚК 190-бабы 4-бөлігі 2-тармағы және 218-бабы 3-бөлігі 3-тармағы бойынша кінәлі деп танып, 10 жылға бас бостандығынан айыру, мүлкін тәркілеу және 10 жыл бойы қайырымдылық ісімен шұғылдануға тыйым салу жазасын кесті. Сонымен қатар оған берілген “Шапағат” мемлекеттік наградасының күші жойылды.
Ғайни Алашбаева да аталмыш баптар бойынша кінәлі деп танылып, 7 жылға сотталды.
Сот үкімі бойынша айыпталушылардан 50 жәбірленуші 1,5 млрд теңге өндіреді.
Перизат Қайраттың адвокаты Асланбек Дәулетияров сот үкімі шықпастан бірнеше минут бұрын журналистерге комментарий берді:
«Тағылған айыпты заңсыз әрі негізсіз деп санаймын. Өз уәждерімді жабық сот отырысында айттым. Мен айыпталушыларды кінәлі деп есептемеймін, себебі сот тарапынан олардың кінәсін дәлелдейтін айғақтар ұсынылған жоқ», – деді ол елордалық сот кулуарында.
Естеріңізге сала кетейік, 2024 жылдың қарашасынан бастап Biz Birgemiz қайырымдылық қорының басшысы Перизат Қайрат пен Ғайни Алашбаеваға қатысты сотқа дейінгі тергеу-тексеру жұмыстары жүрді. Негізгі сот ісі 14 шілде күні Астананың қылмыстық істер жөніндегі ауданаралық сотында басталды.
фото: Instagram/ 01pk
