Украиналық дрондар Орынбор газ өңдеу зауытына қайтадан шабуыл жасады, деп хабарлады Reuters агенттігі.
Ұзақ қашықтыққа ұшатын украиналық дрондар Ресейдің Темрюк портындағы мұнай өнімдері сақталған резервуарларға және Орынбордағы газ өңдеу зауытына соққы жасаған. Орынбор газ өңдеу зауытында шикі газды тазарту қондырғысы зақымдалды.
Орынбор газ өңдеу зауытында Қарашығанақ кен орнында өндірілетін газдың үштен бірі өңделеді. Жылына бұл кәсіпорында Қазақстаннан жеткізілетін 9 млрд текше метр газ тазартылып, кәсіпорындар мен халыққа жеткізіледі.
Айта кетейік, 19 қазанға қараған түні Орынбор және Самара облыстарына ұшқышсыз ұшатын аппараттар шабуыл жасады. Орынборда дрон соққысынан кейін газ өңдеу зауыты отқа оранды.
22 қазанда Орынбор газ өңдеу зауыты Қарашығанақ кенішінен қайтадан газ қабылдай бастады.
Украиналық дрондар 29 қарашада Каспий құбыр желісі консорциумына шабуыл жасады. Бұның салдарынан катерлер мұнай тиеуді тоқтатып, желтоқсанның алғашқы екі күнінде Қазақстанның мұнай және газ конденсатын өндіру көлемі 6%-ға азайды.
фото: freepik.com
