Орал қаласының тұрғыны анасының өлімі үшін ауруханадан моральдық залал ретінде екі млн теңге өндіріп алды.
2019 жылы жедел жәрдем бригадасы дене қызуы көтеріліп, бойынан әлсіздік байқалған 76 жастағы әйелді Орал қалалық ауруханасына жеткізеді. Дәрігерлер науқасқа созылмалы бронхит пен пневмония деген диагноз қойып, терапия бөліміне жатқызған. Ем нәтиже бермей, науқастың жағдайы ауырлай түскен.
«Осы кезде компьютерлік томография плеврит болуы мүмкін екенін көрсеткен. Төрт аптадан кейін науқастың жағдайы нашарлауына байланысты облыстық ауруханаға жеткізіліп, сол жерде қайтыс болған. Ал әйелдің ұлы денсаулық сақтау басқармасына дәрігерлердің салғырттығы мен тиісті ем қабылдамағаны туралы шағыммен жүгінген. Тексеру барысында аурухана тарапынан заң бұзушылықтар анықталды. Тексеру материалдары Батыс Қазақстан облыстық полиция департаментіне жолданып, қылмыстық іс қозғалып, қылмыстық құқық бұзушылық құрамының болмауына байланысты бірнеше рет тоқтатылып, прокуратура оның күшін жойған», — делінген Жоғары соттың хабарламасында.
Денсаулық сақтау басқармасы қалалық аурухананың қарсылығын қабылдамағандықтан, марқұмның ұлы ауруханадан моральдық шығынды өтеу туралы Орал қаласының №2 сотына шағым түсіреді.
Ол ананың өліміне сапасыз медициналық көмек пен қалалық аурухана дәрігерлерінің әрекетсіздігі себеп болғанын атап өткен. Сондай-ақ талап қоюшының анасы емделіп жатқан аурухананың терапия бөлімінде жалпы практикалық дәрігердің куәлігі бар маман жұмыс істегені, оған құқығы жоқ екені туралы факт анықталды.
Сарапшы науқасқа оның жасы мен онда бар созылмалы аурулары, соның ішінде, бүйректің жедел зақымдануын тудырған антибиотиктер ескерілмей, дәрі-дәрмек тағайындалғанын анықтады.
«Тиісті бактерияға қарсы препараттар мен гемодиализді енгізу науқастың өмірін ұзартуы мүмкін еді. Сот медициналық құжаттарды, сарапшылық қорытындыларды және тексеру актісін ескере отырып, дер кезінде қайталама сынақтар өткізбеу, науқастың жағдайын дұрыс бағаламау, нефролог кеңесінің уақытында болмауы мен консилиумның кеш жүргізілуі аурудың нәтижесіне әсер еткенін және өлімге әкеліп соққанын анықтады. Жоғарыда айтылғандардың негізінде талап қою ішінара қанағаттандырылды. Талап қоюшының пайдасына ауруханадан екі млн теңге моральдық шығын өндірілді. Шешім заңды күшіне енген жоқ», — деп хабарлады Жоғары сот.
Сурет: freepik.com
