Мемлекет басшысы зейнетақы төлемінің шекті межесін 1 сәуірге дейін өзгертпеуді тапсырды

Бұл жайлы Президент Қасым-Жомарт Тоқаевтың баспасөз хатшысы Берік Уәли Фейсбуктегі парақшасында хабарлады
«Мемлекет басшысы Қасым-Жомарт Тоқаев зейнетақы жинақтарының шекті межесін көтеру туралы шешімге қатысты көпшіліктің өтінішіне құлақ асты.
Шекті меже келесі жылдан бастап ең төменгі жалақының өсуіне байланысты көтеріледі. Зейнетақы жүйесінің негізгі міндеті – азаматтарды зейнетке шыққаннан кейін қажетті жеткілікті табыспен қамтамасыз ету. Сондықтан зейнетақы жинақтарының шекті межесін көтеру жөніндегі шешім – негізінен осы бағыттағы дұрыс қадам.
Сонымен қатар Мемлекет басшысы зейнетақы қорындағы шекті межеден асқан қаржысын пайдаланып үлгермеген азаматтарды қолдап, Үкіметке бұрынғы шекті межені көтеру мерзімін 2022 жылдың 1 сәуіріне дейін ұзартуды тапсырды» деп жазды Берік Уәли.
Еске сала кетсек, 2022 жылы біржолғы зейнетақы төлемін алудың жеткіліктілік шегі 1,8 есе көтерілетіні хабарланып, халық әлеуметтік желілерде жаппай наразылық білдірді. Бірыңғай жинақтық зейнетақы қоры мұны алдағы жылы ең төменгі жалақы мөлшері 42 500 теңгеден 2022 жылы 60 000 теңгеге дейін (немесе 41%) өсетіні ескеріліп көбейткенін мәлімдеген болатын.

 

Әлеуметтік желілер арқылы бөлісуді ұмытпаңыз

Пікір үстеу

Э-пошта мекенжайыңыз жарияланбайды. Міндетті өрістер * таңбаланған