Қазақстанның экс-президенті Нұрсұлтан Назарбаевтың ортаншы қызы – Динара Құлыбаева мен оның күйеуі, олигарх Тимур Құлыбаев бұған дейін мемлекет меншігіне қайтарылған Қазақстан-Британ техникалық университетін (ҚБТУ) Конституциялық сот арқылы қайтаруға тырысып жатыр, деп жазды Kaztag агенттігі.
Ғылым және жоғары білім министрі Саясат Нұрбек сейсенбі күні өткен үкіметтік брифингте ҚБТУ-дың мемлекет меншігіне қайтарылуы туралы ақпарат берген. Ол бірінші және екінші сот инстанцияларының шешімдері бойынша ҚБТУ мемлекетке қайтарылуы тиіс екенін, қазір конституциялық шағым қаралып жатқанын, соңғы шешімді Жоғарғы сот шығаратынын айтқан.
Министр бұл процестің құқықтық алаңда жүріп жатқанын және министрлік бұл процеске қатысы жоқ екенін атап өткен.
4 наурызда бұқаралық ақпарат құралдары ҚБТУ мемлекет меншігіне өткені туралы жазды.
Қазақстан-Британ техникалық университеті (ҚБТУ) 2018 жылы жекешелендіру бағдарламасы аясында «Нұрсұлтан Назарбаев білім беру қорының» меншігіне өткен. Қордың құрылтайшыларының бірі – Динара Құлыбаева. Алайда 2025 жылдың 27 ақпанында ҚБТУ-дың 100% акциясы «Қайтарылған активтерді басқару компаниясына» (ҚАБК) қайтарылған.
Биыл ақпан айында Bloomberg агенттігі Тимур Құлыбаевтың үкіметтік тергеу аясында мемлекетке шамамен 1 миллиард доллар төлеу туралы келіссөз жүргізіп жатқанын мәлімдеген еді.
Одан бөлек былтыр Тимур Құлыбаев Бас прокуратураның активтерді қайтару комитетін сотқа бергені туралы да Қазақстан БАҚ-тары жазды.
