Қазақстанда келер жылы 99 базар жаңғыртылады. Бұл жөнінде Сауда және интеграция министрлігі Сауда комитетінің төрағасы Айдар Әбілдабеков орталық коммуникациялар қызметінде өткен баспасөз мәслихатында мәлімдеді.
«Жыл басынан бері сауда базарларының жай-күйін бағалау еліміздің барлық өңірлеріне барып егжей-тегжей түгендеу жүргізілді. Бұл жұмысты біз әкімдіктермен, мемлекеттік кірістер, төтенше жағдайлар, мемлекеттік сәулет-құрылыс бақылауы, санитарлық-эпидемиологиялық бақылау өкілдерімен бірлесіп жүргіздік. Өңірлік сапарлардың қорытындысы бойынша сауда базарларын жаңғырту жөніндегі Жол картасын өзектендірдік. Осылайша, өзектендірілген 2024-2025 жылдарға арналған Жол картасына сәйкес 115 базарды жаңғырту жоспарланған», — деді ол.
Комитет басшысының айтуынша, биыл 16 базарда жаңғырту жұмысы аяқталуы керек.
Жалпы биыл ішкі саудадағы жеке кәсіпкерлерге мемлекеттік қолдау көрсету үшін төрт млрд теңге бөлінбек. Осының негізінде 1 қазаннан бастап ішкі сауда субъектілеріне мемлекеттік қолдау шараларын көрсету жоспарланып отыр.
«Мемлекеттік қолдау шаралары екі түрлі жолмен көрсетіледі: несие мөлшерлемесін субсидиялау және несиеге кепіл беру. Жалпы мемлекеттік қолдау шаралары төрт түрлі мақсатқа бағытталған. Олар: сауда базарларын жаңғырту, сауда объектілерін салу, кеңейту, реконструкциялау, үй жанынан дүкен салу және осы салада IT бағдарламалар жасау», — деді ол.
Айтып өтелік, жыл басында енді базарларды модернизациялау мерзімі ұзартылмайтыны айтылды. 2025 жылдың соңына дейін еліміздегі барлық сауда нүктелері қаланың архитектурасына, санитарлық және өртке қарсы талаптарға сай болуы керек.
Статистикаға сүйенсек, қазір елімізде 700-ден астам базар бар. Бес жүзге жуық сауда базары қалалық жерде, қалғаны ауылдық жерде орналасқан.
Базарлардың ең көп саны – Түркістан облысында, оған қоса Алматы және Ақтөбе облыстарында ооналасқын. Елдегі базарлардың жалпы ауданы 7,7 млн м2 құрайды.
Сурет: freepik.com
