Каспий құбыр консорциумына жасалған дрон шабуылына қарамастан, Теңіз кен орнынан мұнай үздіксіз жүріп жатыр. Бұл туралы «Интерфакс» басылымы хабарлады.
«Теңізшевройл» компаниясы шикі мұнай өндірісі мен оны Каспий құбыр консорциумы арқылы айдау жұмыстарын үздіксіз жүргізіп жатыр», – деп хабарлаған компания.
Ақпанның 17-сі күні Каспий құбыр консорциумы (КҚК) Ресейдің Краснодар өлкесіндегі «Кропоткинская» мұнай айдау станциясына дрон шабуылы жасалғанын хабарлады. Шабуыл салдарынан мұнай айдау көлемі төмендеп, станцияның жұмысы уақытша тоқтады.
Ресейдің вице-премьері Александр Новак мұнай айдау станциясының жөндеу жұмыстары бірнеше айға созылатынын, шикізат жеткізу көлемі 30-40%-ға төмендеуі мүмкін екенін айтқан еді.
Каспий құбыр консорциумы арқылы Қазақстан мұнайының 80%-ы экспортталады. Ресей тарапы осыған байланысты Қазақстан да зардап шегеді дегенді меңзеген. Ресейдің сыртқы істер министрі Сергей Лавров бұл оқиғаны «Қазақстан энергетика инфрақұрылымына тікелей шабуыл» деп бағалады.
«Іс жүзінде Қазақстанның энергетика инфрақұрылымына шабуыл жасалды және оған не түрткі болды дегенге келсек… Киевте отырған әлдекімнің мұндай бұйрық беруіне көп себеп келтіруге болады немесе оның негізінде не жатқанын тек болжай аламыз. Десе де осы жағдай бәріне «бұлай жалғасуға болмайды» дегенді айқындап, [Зеленский] мен оның командасын жөнге келтіріп, қолын қағатын уақыт келді дегенді нақ көрсетті», – деді Лавров.
Осыған дейін мәжіліс депутаты Никита Шаталов КҚК-ға дронмен шабуыл жасағаны үшін Украинаны жауапкершілікке шақыру қажет деді.
«Дүйсенбіде КҚК шабуылға ұшырады және украин жағы бұл үшін жауапкершілікті мойнына алды. Шабуылдаушы тарап «Ресейдің қарулы агрессиясын қолдайтын стратегиялық нысандарға соққы жасау» құқығын бар екенін айтты. Бұл ұстанымға экономикалық және дипломатиялық тұрғыда қайшылық өте көп, мұны не үшін жасады деген сұрақ бар. Украина жағы бұл құбыр бойынша айдалатын мұнайдың 90 пайызы Қазақстандікі екенін, Теңіз кенішінен өндірілетінін, одан шикізатты Еуроодаққа тасымалдайтын Батыстың түрлі компаниялары пайда көріп отырғанын білмеуі мүмкін емес», — деп мәлімдеме жасаған депутат өз телеграм арнасында.
Ал Мәжіліс депутаты Ермұрат Бапи Украина Ресей аумағында қай нысанға шабуылдайтыны жөнінде ешкіммен ақылдаспайтынын айтты.
«Қазақстанның Украинаға бірдеңе деуге қақы жоқ деп ойлаймын. Украина — өзінің халқын, елін, мемлекеттігін қорғап отырған ел. Ол — агрессорға қарсы соғысып жатқан ел. Біз оған не деп айтамыз? Біздің құбырды жарып кеттің деп айтамыз ба? Ол құбыр Россияның жерінде тұр. Қазақстанның жерінде тұрса, әрине, біз айта аламыз. Ол — Ресейдің меншігі. Біз сол Ресейдің құбыры арқылы Батысқа мұнай шығарып жатырымыз. Айналып келгенде әңгіме бізге де тиеді, “Ресейден басқа сендерге бағыт қалмады ма?” деген тұрғыда сұрақтар туады», — деген мәлімдеме жасады депутат мәжіліс кулуарында.
ҚР Сыртқы істер министрлігі бұл мәселе жөнінде Украина тарапымен талқылайтынын мәлімдеді. Кездесу Астана немесе Киевте ұйымдастырылуы мүмкін. Сарапшылар мұнай құбырының істен шығуынан Қазақстан бірнеше млн доллар қаражат жоғалтады деп есептейді.
