27 қаңтарда Алматы қаласының қылмыстық істер жөніндегі мамандандырылған ауданаралық соты Қаңтар оқиғасы бойынша күдікті деп танылған 40-тан аса азаматқа сот үкімін шығарды.
Оның ішінде «Дикий Арман» деп танылған Арман Жұмагелдиев 20 жылға, Алматы қалалық мәслихатының бұрынғы депутаты Қайрат Құдайберген 8 жылға бас бостандығынан айырылды. ҰҚК бесінші департаментінің бұрынғы басшысы Руслан Исқақов 15 жыл 6 айға сотталды.
Сот хабарламасында: «2022 жылдың басында Исқақов, Жұмагелдиев және экс-депутат Құдайберген билікті күшпен басып алу мақсатында жаппай тәртіпсіздіктердің негізгі ұйымдастырушылары болды», — деп көрсетілген.
ҰҚК өкілі Жұмагелдиевті қорғауға уәде берген
Соттың мәліметінше 2016 жылы ҰҚК-ның 5-департаменті басшысының орынбасары болған Исқақов ұлттық қауіпсіздік органдарының қолдауына кепілдік беремін деп уәде беріп, Жұмагелдиевті серіктестікке тартқан.
Сот дерегі бойынша Жұмагелиев 2017 жылдың бастап қылмыстық ұйымының қызметін Түркия Республикасында тұрып, қашықтықтан басқарған. Ол Қазақстан, Түркия және БАӘ-де, ұйымның құрылымдық бөлімшелерінің басшыларымен және мүшелерімен кездесу өткізіп тұрған.
«Жұмагелдиевтің тобы 34 жәбірленушіні ұрлап, ұрып-соғу әрекеттерін жасаған. Кейін, 24 ұсталған адам заңсыз түрде бір ЖШС-ның қоймаларында қамалған», — делінген сот хабарламасында.
Одан бөлек, «The Ritz Carlton Almaty» қонақ үйінің маңында, Жұмагелдиевтің қылмыстық тобының шамамен 15 мүшесі оның бұйрығын орындап, өтіп бара жатқан автокөлікті тоқтатып, ішіндегі 5 азаматты түсіріп алған. Жолаушылардың бірін, шабуылдаушылар басынан балғамен ұрып, есінен тандырған», — деп көрсетілген.
Сонымен қатар Қайрат Құдайбергеннің 2022 жылы «Қазақстан» қонақ үйінде штаб құрып, оған Жұмагелдиевтің тобын шақырғаны, қарулы топтың және оларға қосылған басқа адамдардың әрекеттерін басқарғаны жазылған.
Сот Жұмагелдиев тобына (барлығы 13 адам) 10-15,5 жыл, ал жаппай тәртіпсіздіктерге қатысқан басқа тұлғаларға 1,5-7 жыл аралығында жаза тағайындады.
Оларға ҚР Қылмыстық кодексінің «Билікті немесе қызметтік өкілеттігін асыра пайдалану» (362-бап), «Ұйымдасқан қылмыстық топ құру, басқару және оған қатысу» (262-бап), «Тонау» (191-бап), «Заңсыз бас бостандығынан айыру» (126-бап), «Жаппай тәртіпсіздіктерді ұйымдастыру және оған қатысу» (272-бап), «Бандитизм» (268-бап) баптары бойынша айып тағылды.
Қаңтар оқиғасына қатысты басты сот талқылауы 2023 жылдың қазан айында басталған.
Сурет: sarapshy.info коллажы
