Интернет-алаяқтар Telegram әлеуметтік желісінде электронды кітап сыйлау арқылы деректерді жымқырудың тәсілін ойлап тапқан. Бұл туралы Бас прокуратураның Қылмыстық қатерлер мен қоғамдық қауіпсіздік тәуекелдерін болжау орталығы хабарлады.
Қаскөйлер тегін оқуға болатын, ішінде бірнеше кітабы бар файл жібереді. Бұл файлдың ішінде құпиясөздерді, банк шотының реквизиттерін, жеке хабарламалар мен фотосуреттерді жария ететін вирус бар.
Бұл тәсіл арқылы алаяқтар смартфонды қашықтан басқаруға да мүмкіндік алады.
Айта кетейік, өткен жылы алаяқтар «Электрондық күнделікті жаңарту» деген сылтаумен оқушылардан құпия код сұрауды бастады. Ал көлік жүргізушілеріне айыппұл төлеу жөнінде фишинг хаттар жіберді.
2025 жылдың қарашасында Мәжіліс депутаты Мұрат Абенов қазақстандықтардың атына заңсыз рәсімделген онлайн-кредиттердің күшін жоюды ұсынды.
фото: freepik.com
