Футболдан Қазақстан ұлттық құрамасының экс-бас бапкері Черчесовқа федерация өтемақы төлейді. Мәжіліс кулуарында туризм және спорт вице-министрі Серік Жарасбаев келісімшартты ерте бұзғаны үшін Қазақстан футбол федерациясының Черчесовке өтемақы төлейтінін растады.
«Спортшы болсын, жаттықтырушы болсын егер шарттан ертерек келісімшарт бұзылатын болса, неустойка төленеді», — деді вице-министр.
Станислав Черчесов кім?
Станислав Черчесов — ресейлік футбол жаттықтырушысы, 2024 жылдың маусым айынан бастап Қазақстан ұлттық құрамасының бас бапкері қызметін атқарды. Ол бұған дейін Ресей құрамасын 2018 жылғы әлем чемпионатында ширек финалға дейін жеткізгенімен танымал.
Черчесов Қазақстан ұлттық құрамасының бас бапкері қызметінен 2025 жылдың 27 қаңтарында кетті. Бұл туралы Қазақстанның футбол федерациясы хабарлады. Хабарламада Қазақстан құрамасынан жаттықтырушылар штабы толық құраммен кеткені жазылған.
Оның жетекшілігімен команда УЕФА Ұлттар лигасы аясында алты матч өткізді. Өкінішке қарай, бұл ойындардың бірде-біреуінде гол соға алмай, тек бір ғана ұпай жинады. Нәтижесінде, Қазақстан құрамасы турнирдің төменгі дивизионына түсіп қалды.
Қазақстандықтар Черчесовқа неге наразы?
2024 жылдың қазан айында Словениямен өткен матчтан кейінгі баспасөз мәслихатында Черчесовке қазақ тілінде сұрақ қойылды. Ол журналисті тоқтатып, «Сен қазір французша сөйлеп тұрсың ба?» — деп сұрады. Бұл мәлімдеме Қазақстан қоғамында наразылық тудырып, оны мемлекеттік тілге құрметсіздік деп қабылдады. Нәтижесінде, Қазақстанның Мәдениет және спорт министрлігі Қазақстан футбол федерациясынан түсініктеме талап етті.
Сол кездегі Қазақстан футбол федерациясының бұрынғы президенті Әділет Барменқұловтың мәлімдеуінше, Станислав Черчесовке 200 айлық есептік көрсеткіш (АЕК) мөлшерінде айыппұл салынды, бұл 738 400 теңгеге тең.
Сурет: ҚФФ
