«Азаттық радиосы« жұмысын жалғастыра бермек. Бұл туралы «Азаттық радиосының« қазақ бөлімінің басшысы Төреқұл Дооров мәлімдеді.
Ол редакция әзірге жұмысты жалғастыра беретінін хабарлады.
«Азаттық радиосы» қандай қиындықтан өтпеді, шынайы ақпарат, демократия құндылықтарын тарату миссиясында қандай тоталитардық режимдер қысымын көрмеді! Сол елдерде тұрған миллиондаған халық үшін шындықтың жалғыз шамы болып келді. Қазіргі жағдай бізді қалай өзгертетінін толық ашып айту мүмкін болмай тұр”, — деді Дооров.
Саясаттанушы Шалқар Нұрсейіт те «Азаттық радиосы» жабылса, Қазақстанның жоғалтатыны көп дейді.
“Азаттық радиосы» қызметін тоқтатса, Трамп пен Масктың ештеңесі кетпейді. Екі миллиардер арзан, уақытша саяси ұпай жинайды. Ал Қазақстанның жоғалтатыны өте көп. Азаттық радиосы қызметін тоқтатса, елімізде “Заң мен тәртіп диктатурасының” көкесі сонда болады. Ол отызға жуық саяси тұтқынның қазіргі шарасыз күйін алда бүкіл қазақ қоғамы кешеді деген сөз”, — дейді.
Илон Маск 2025 жылғы 9 ақпанда X (бұрынғы Twitter) әлеуметтік желісінде АҚШ үкіметі қаржыландыратын «Азаттық радиосы« мен «Америка дауысы« медиакорпорацияларын жабуды ұсынды. Ол бұл ұйымдарды «радикалды солшылдар» деп атап, олардың жылына 1 миллиард доллар салық төлеушілердің қаражатын ысырап ететінін және қазіргі уақытта оларды ешкім тыңдамайтынын мәлімдеді.
Естеріңізге сала кетейік, 16 наурызда АҚШ президенті Дональд Трамп «Федералдық бюрократияны қысқартуды жалғастыру туралы» жарлыққа қол қойды. Бұл құжат жеті федералдық агенттікке, соның ішінде АҚШ-тың ғаламдық медиа жөніндегі агенттігіне (USAGM) қарасты «Азат Еуропа/Азаттық радиосы» (RFE/RL), «Америка дауысы» (VOA), «Азат Азия радиосы» (RFA) және басқа да халықаралық хабар тарату ұйымдарына бағытталды.
Жарлыққа сәйкес, аталған агенттіктер өз қызметі туралы есеп беріп, қайсысы заңмен бекітілгенін анық көрсетуі тиіс.
Жарлық жарияланған соң, USAGM Азат Еуропа/Азаттық радиосын қаржыландыруға бөлінген гранттың тоқтатылғанын хабарлады. Бұған жауап ретінде корпорацияның басшысы Стивен Капус бұл қадам АҚШ-тың қарсыластарына «үлкен сыйлық» болатынын айтып, оның Американың ықпалын әлсірететінін ескертті.
USAGM жыл сайын 360 миллионнан астам адамға 50-ден астам тілде хабар таратады. Оның 2025 жылға арналған бюджеттік өтінімі – 950 миллион доллар. Трамптың бірінші президенттік мерзімінде де ол агенттікпен редакциялық тәуелсіздікке қатысты жиі келіспеушілік болған.
2023 жылы «Азаттық радиосының« Орталық Азия редакцияларының ашылғанына 70 жыл толды. Азаттық радиосының Қазақ, Қырғыз, Өзбек, Тәжік және Түркімен қызметтері жұмыс істейді.
Қырғызстан президенті Садыр Жапаровтың «Азаттық радиосының» дәурені өтті деген мәлімдемесіне қарамастан, «Азаттықтың» Қырғыз қызметі өз жұмысын жалғастыруда. Бішкектегі бөлімше директоры Венера Жұматаева қазіргі уақытта қызметін тоқтатпай, тыңдармандар мен оқырмандарға шынайы ақпарат жеткізуді жалғастырып жатқанын атап өтті.
Сурет: Ulysmedia.kz
