Облыстық мемлекеттік кірістер департаментінің қызметкері Аян Бурашевке қатысты үкім шықты. Ол 75 млн теңге көлемінде пара алған.
Сотталушы ауыр салмақты көліктердің «Сырым» бақылау-өткізу бекеті арқылы кедергісіз және жылдам өтуіне көмектескені үшін ақша алған. Ол мемлекеттік кірістер департаментінде жетекші маман қызметін атқарған.
Мемлекеттік айыптаушы сотталушыға 12 жыл бас бостандығынан айыру жазасын тағайындауды сұрады. Алайда сотталушы өз кінәсін мойындамаған.
Сот шешімі
«ҚК-нің 366-бабының 4-бөлігінің санкциясында мүлкін тәркілеу, белгілі бір лауазымдарды атқару немесе белгілі бір қызметпен айналысу құқығынан өмір бойына айыра отырып, параның жетпіс еселенгеннен мөлшерінен сексен еселенген мөлшеріне дейінгі сомасы мөлшерінде айыппұл салуға не 10 жылдан 15 жылға дейінгі мерзімге бас бостандығынан айыру жазасы көзделген» — делінген хабарламада.
Ақпарат құралдарындағы мәлімет бойынша, Бурашев мемлекеттік қызметкер ретінде 2021 жылдың желтоқсанынан 2022 жылдың 22 қыркүйегіне дейін ер адамнан 75 миллион теңге көлемінде пара алған.
Сот Бурашевтен пара ретінде алған 75 миллион теңгені өндіріп, сондай-ақ екі көлікті – 2014 жылғы Toyota Camry мен 2020 жылғы Hyundai Creta-ны мемлекет кірісіне тәркілеген.
Сот Бурашевтің жас балаларының болуын ескерді. Бірақ мемлекеттік қызметшінің антын бұзуы жазаны ауырлататын фактор деп таныды. Сот шешімімен ҚК-ның 366-бабының 4-бөлігімен кінәлі деп танылып, оған 10 жыл мерзімге бас бостандығынан айыру жазасы тағайындалды.
Жазасын қылмыстық-атқару жүйесінің орташа қауіпсіз мекемесінде өтеу белгіленді.
Сурет: tv7.kz
