Батыс Қазақстан облысының әкімі Нариман Төреғалиев кеңсе қызметіне мол қаражат бөлетін ондықтың ішіне енді.
Әкім аппаратын қаржыландыруға бюджеттен 2,8 млрд теңге бөлінеді. Айта кетейік, тізімде 20 облыс және қала әкімінің есімі аталған. Бұл туралы National Business Kazakhstan талдау орталығы мәлімдеді.
Әкім жұмысына кететін 2,8 млрд теңге облыс бюджетінің 0,7%-ын құрайды. Айта кетейік, 2025 жылы облыс бюджетінің көлемі 562 млрд теңгені құрады.
Рейтингтің бірінші орнында Алматы қаласының әкімі Дархан Сатыбалды тұр. Оның қызметіне бюджеттен 5 млрд теңгеден жұмсалады.
Екінші орын Алматы облысының әкімі Марат Сұлтанғазиевқа тиесілі. Әкім аппаратына 4,3 млрд теңге бөлінеді.
Үшінші орында Маңғыстау облысының әкімі Нұрдәулет Қилыбай тұр. Облыс әкімінің жұмысына 3,9 млрд теңге немесе облыс бюджетінің 0,9%-ы кетеді.
Астана қаласының әкімі Жеңіс Қасымбек тізімде сегізінші орын иеленді. Астана әкімінің жұмысын қаржыландыруға БҚО әкімімен тең қаражат — 2,8 млрд теңге бөлінеді.
