БҚО-дағы Казталов ауданының Қараөзен ауылында өртенген мектеп-лицей интернаты ғимаратының құрылысын мердігер қалыпқа келтіреді. Бұл жөнінде мектеп директоры Қайырлы Бижанов хабарлады.
Аудан әкімдігінің мәліметі бойынша жоба құны — 1 млрд 63 млн теңге. Интернатты күрделі жөндеуге смета бойынша 81,6 млн теңге бөлінген.
ТЖД ақпаратына сай өрт оқиғасы туралы қоңырау 9 шілде күні сағат 14:30-да түскен. Нысанның ауданы — 388 шаршы метр.
Сол күні өртті сөндіруге 13 өрт сөндіруші мен 2 техника жұмылдырылды.
Тілсіз жау ауыздықталды. Зардап шеккендер жоқ. Қазіргі уақытта өрттің шығу себептері анықталып жатыр.
Қараөзен мектеп-интернатының директоры Қайырлы Байжанов мердігер компания құрылысты қайтадан қолға алатынын хабарлады.
– Құрылыс жұмысы оқу жылының соңында басталды. Мердігер компания интернат ғимаратын қалпына келтіреміз деп уәде берді. Құрылысқа қажет материалдарға сұраныс беріліп қойған. Жөндеу дер кезінде аяқталып, келер оқу жылын уақытылы бастаймыз деп сенеміз. Өрт себебі әзірге белгісіз, – деді ол.
Облыстық білім басқармасының баспасөз қызметкері Гаухар Дүйсекованың мәліметі бойынша мектепте 222 бала білім алады. Г. Дүйсекова интернатты қалпына келтіру жұмыстары заң талаптарына сәйкес жүргізілетінін айтты.
Мердігер компанияның өкілі қазіргі таңда өрттің шығу себебін, шығын есебін анықтау үшін арнайы комиссия жұмыс істеп жатқанын жеткізді.
Мемлекеттік сатып алу сайтындағы ақпарат бойынша жөндеу жұмысын «Жайық Сити» жауапкершілігі шектеулі серіктестігі жүргізіп жатыр. Казталов ауданының білім бөлімі мен «Жайық Сити» ЖШС 2025 жылдың ақпан айында келісімшарт жасаған. Сайтта жобаның жалпы құны – 800 млн теңге деп көрсетілген.
2021 жылы интернат ғимараты апатты деп танылған. Жатақханада 50 жатын орны бар.
фото: Қараөзен мектеп-лицейі әлеуметтік желі парақшасынан
