Прокурорлар Жәнібек ауданында Т. Жароков атындағы жалпы орта білім беретін мектепте заңбұзушылықты анықтады. Мектепте «Өмір қауіпсіздігінің негіздері» бойынша мұғалімдер сабақ бермеген.
Оқу-ағарту министрінің «Мектепке дейінгі тәрбие мен оқытудың, бастауыш, негізгі орта, жалпы орта, техникалық және кәсіптік, орта білімнен кейінгі білім берудің мемлекеттік жалпыға міндетті стандарттарын бекіту туралы» 2022 жылдың 3 тамызындағы №348 бұйрығына сай мектептер аталған курс міндетті түрде өткізілуі керек.
1-4 сынып оқушыларына «Дүниетану» пәні аясында «Өмір қауіпсіздігінің негіздерін» бастауыш сынып мұғалімі үйретеді. Ал 5-9 сыныптарда дене шынықтыру мамандары курсты жүргізуге тиіс.
«Еңбек қатынастары саласындағы бұзушылықтар да тіркелді. Қызметкерлер ұжымдық шарттармен таныспаған, ал еңбек шартын бұзу кезінде белгіленген нормалар сақталмаған», – деп хабарлады облыстық прокуратураның баспасөз қызметі.
Аудандағы 30 лауазымды тұлға тәртіптік, 8 қызметкер әкімшілік жауапкершілікке тартылды.
Т. Жароков атындағы мектеп аудан орталығында орналасқан. Білім ошағында 1-4-сыныптарда «Өмір қауіпсіздігінің негіздері» оқу курсын міндетті меңгеру қамтамасыз етіледі. Оқу курсының мазмұнын 1-4-сыныптарда «Дүниетану» оқу пәнінің шеңберінде жылдық оқу жүктемесі 1-3-сыныптарда 6 сағаттан, 4-сыныпта 10 сағаттан бастауыш сынып мұғалімдері іске асырады.
«Өмір қауіпсіздігінің негіздері» оқу курсының мазмұны 5-9-сыныптарда дене шынықтыру оқу курсының аясында 15 сағаттық жылдық оқу жүктемесімен дене шынықтыру мұғалімінің оқытуымен іске асырылады. «Өмір қауіпсіздігінің негіздері» бойынша сабақтар міндетті болып табылады және оқу процесі кезінде жүргізіледі.
Сурет: ашық дереккөзден
