Қазақстанның ішкі нарығында тауарлық газ бағасы бес жыл бойы 30%-ға өсіп отырады. Бұл туралы энергетика министрі Алмасадам Сәтқалиев брифингте мәлімдеді.
Қазір Қазақстанда ішкі нарықтағы тауарлық газдың бағасы шетелге сатылатын газдан түскен ақшамен төмендетіліп отыр. Оның айтуынша, QazaqGaz компаниясы сыртқы несиесін өтеуі үшін және шығынға ұшырамауы үшін Қазақстанда газ бағасын көтеру қажет.
Бұған дейін «QazaqGaz» АҚ төрағасы Санжар Жаркешов QazaqGaz Ұлттық компаниясының 1 млрд доллар қарызы бар екенін айтты.
Сондай-ақ министр тауарлық газ бағасын бірден емес, кезең-кезеңмен біртіндеп көтеру жоспарланғанын айтты.
«Мұның бәрі компанияның қаржылық жағдайына байланысты. Әр жолы мұндай шешімдер құнның күрт өсуіне жол бермеу тұрғысында қабылданады, ал өсім аз-аздан кезең-кезеңге сай жүзеге асыру тұрғысында жоспарланған», — деді министр.
Осыған дейін Энергетика министрі 2025 жылы 12 миллион 400 мың тұрғын газбен қамтамасыз етіледі деген еді.
2024 жылы сұйытылған газ бағасы тоннасына 40 320 теңгеден 45 158 теңгеге дейін қымбаттаған. Соның әсерінен автокөлік газының да құны өсті.
2025 жылдың 1 ақпанынан бастап, ҚР Энергетика министрі Алмасадам Сәтқалиевтің бұйрығымен аймақтарға байланысты сұйытылған газдың бөлшек саудадағы шекті бағасы 6-дан 21 теңгеге дейін өскен.
Cурет: Pixabay
