Қаржы мониторингі агенттігі жалған стоматологиялық клиника ашқан күдіктілерге іздеу жариялады.
Қара тізімде Аслан Қамбарұлы Дүйсенов (01.04.1992 ж. т.), Ғаббас Иманбаев (18.05.1998 ж. т.), Есімхан Баяндиевич Елешев (11.09.1987 ж. т.) бар. Олар Маңғыстау мен Атырау облыстарында қағаз жүзінде жеті емхананы ашып, тіс емдеуге арналған зейнетақы қаражатын жымқырғаны белгілі болып отыр.
«Аталған азаматтар 46 млрд теңгеден астам қаражатты БЖЗҚ заңсыз шығару мақсатында қылмыстық схемаларды ұйымдастырды деген күдікке ілінген. Бұл мақсатта олар тіс емдеу қызметі көрсетілгендей жалған медициналық құжаттарды рәсімдеген», — деп хабарлады ҚМА.
Іздеу жарияланғандардың ішінде Аслан Дүйсенов бұрын полиция қатарында еңбек еткен. Оның басқа да атышулы істрег қатысы болып шықты.
2016 жылы Дүйсенов Қылмыстық кодекстің 105-бабы («Өз-өзіне қол жұмсауға дейін жеткізу») және 362-бабы («Қызметтік өкілеттіктерін асыра пайдалану») бойынша ауыр қылмыс жасағаны үшін бес жылға түрме жазасы кесілген.
Қазақстанда 2021 жылдан бері салымшылар тісін емдету үшін зейнетақы қорынан 642 млрд теңге жұмсаған. Қыркүйек айында стамотологиялық қызмет үшін «Отбасы банк» шотынан қаражат аудару тоқтатылды.
фото: ЖИ-генератор
