Су ресурстары министрлігі 6 облыс бойынша көктемгі су тасқынын алдын алу мақсатында 56 жобаның іске асып жатқанын хабарлады.
Ақмола, Ақтөбе, Батыс Қазақстан, Павлодар, Солтүстік Қазақстан және Қостанай облыстарында 580 мың тұрғыны бар 84 елді мекенде жалпы ұзындығы 310 шақырым бөгет салынып жатыр деді министрлік.
2024 жылдың көктемінде Қазақстанның бірнеше өңірінде су тасқыны болды. Еліміздің 10 облысында төтенше жағдай жарияланды. Салдарынан 224 елді мекен, 17 603 тұрғын үйге зиян келді.
Одан бөлек, ауыл шаруашылығы мен мал шығыны, инфрақұрылым да зардап шекті. 120 мыңнан астам адам өз баспаналарын тастап кетуге мәжбүр болды. Ауыл шаруашылығы министрлігінің мәліметінше, 8100 бас мал шығыны тіркелген. Оның ішінде ұсақ мал – 6 мың, ірі қара – 1,5 мың, жылқы – 514 бас. Агроөнеркәсіптік кешен субъектілеріне жойылған ауыл шаруашылығы дақылдары мен суға кеткен жануарлардың иелеріне шығынды өтеу үшін шамамен 3,15 млрд теңге бөлінген.
Үкіметтің мәліметінше, тасқыннан жалпы 300 млрд теңге шығын келген.
Әсіресе су елдің Батыс өңірі, Ақтөбе, Атырау, Орал қалаларының шеткі аудандарын басты. Соның ішінде Атырау қаласы “қызыл аймаққа” еніп, әртүрлі сала мен бағыт бойынша тежеу байқалды.
Биыл Батыс Қазақстан облысы бойынша су тасқыны қаупі бар 186 елді мекен тіркелген. Соның 68-іне әлі қауіп төніп тұр.
Көктемгі су тасқыны жағдайында халық биліктің “дайындықсыз” болғанын сынады. Ал билік климаттық өзгерістер, жаһандық жылынуды айыптайды.
Kazinform жасаған талдауда Қазақстандағы су қоймалары Кеңес кезеңде салынғаны жазылған. Демек, тәуелсіздіктен кейін жаңа қоймалар салу бәсеңдеген.
Су ресурстары және ирригация министрлігі Қазақстанда ақауы бар гидротехникалық құрылысжайлардың (ГТҚ), бөгет-плотиналардың саны 537-ге жеткенін айтады.
Гидрологиялық болжам бойынша, 2025 жылы қыста температура режимі климаттық норма шегінде болып, жауын-шашын мөлшері көпжылдық нормадан асады.
Үкімет биыл көктемгі су тасқыны кезеңіне дайын екенін айтады. «Қазгидромет» РМК су басу қаупі басым өзен учаскелерінде 31 деңгейлі гидрологиялық бекет ұйымдастырылып, ашылған.
“Қазір 377 гидрологиялық бекет, 25 қар өлшегіш маршрут және 347 метеорологиялық станса жұмыс істейді. 9 облыста коммуналдық меншіктегі гидротехникалық құрылыстарды күтіп ұстау және оларға қызмет көрсету бойынша мамандандырылған ұйымдар құрылды” — делінген хабарламада.
Сурет: baq.kz
