Қазақстанда жаңа уақыт белдеуінің адам ағзасына тигізетін әсерін зерттеу үшін 100 млн теңге қаражат бөлінеді. Бұл туралы Ғылым және жоғары білім министрі Саясат Нұрбек мәлімдеді.
Министрдің айтуынша, бастапқыда Денсаулық сақтау министрлігі зерттеуге 160 млн теңге сұраған. Алайда 100 млн теңге көлемінде қаражат бөлінуі мүмкін. Зерттеуді жүзеге асыру үшін алдағы уақытта арнайы конкурс жарияланады.
Зерттеу жұмыстарына елдегі жетекші ғылыми мекемелер, атап айтқанда, Физиология және География институттары қатысады.
Қаражаттың орнықты жұмсалуына Денсаулық сақтау министрлігінің өзі кепіл болатынын атап өтті.
Қазақстанда бірыңғай уақыт белдеуіне көшу туралы шешім қабылданғаннан кейін кейбір өңір тұрғындары сағаттың ауысқанына наразы болды. Әсіресе, Шығыс Қазақстан, Солтүстік, Ақмола, Алматы облыстарында күннің ерте батқанына және таңның ерте атқанына шағымданғандар көбейді.
Бұған дейін тұрғындар бірнеше мәрте петиция жариялады. Бірақ қарсы шыққандардың уәжін ведмстволар қабылдаған жоқ. 19 қарашада Үкімет басшысы Олжас Бектенов Сыртқы және интеграция министрлігі мен Мәдениет және ақпарат министрлігіне түсіндіру жұмысын жүргізуді тапсырды.
2024 жылдың 1 наурызында сағат 00:00-ден бастап елдің бүкіл аумағы бірыңғай уақыт белдеуіне көшті. Қазіргі уақытта барлық аймақ 5-ші уақыт белдеуіне (UTC+5) жатады.
Сурет: Pixabay
