Биыл 34 блогер онлайн-ойындарды жарнамалаған. Енді оларды органдар жазаламақ. Бұл жөнінде Қаржылық мониторинг агенттігі хабарлады.
Белгілі болғаны, блогерлердің 11-і әкімшілік жауапкершілікке тартылып, 23 контент жасаушыға қатысты іс Мәдениет және ақпарат министрлігіне жолданған.
Агенттік анықтаған блогерлер ішінде Қайсар Қамза, Шыңғысхан Көпбаев, Тәуіржан Айтмаханов, Наиль Тұрғанов, Диляра Аманқосқызы бар.
«Блогерлердің көпшілігі заңды бір рет емес, жүйелі түрде бұзады. Мәселен, хип-хоп орындаушы «Baller» (шын аты – Шыңғысхан Көпбаев) жыл басынан бері бес рет жауапқа тартылды. Сондай-ақ 600 мыңнан астам жазылушысы бар музыкант-блогер Ринат Шамшыраққа қатысты да онлайн-казино жарнамалағаны үшін әкімшілік іс қозғалды. Сонымен қатар блогер «Niko_nett» пен инфлюенсер Қайсар Қамза да ерекше назарда. Соңғысы өзінің Telegram-арнасында заңсыз ойындарды үнемі насихаттап, жалған жеңімпаздардың видеоларын жариялап келеді», — деп хабарлады агенттік.
Наиль Тұрғанов атты блогер онлайн-казино жарнамасы үшін 8 млн теңгеден астам қаржы алған. Ал Нұрғазы Тоқтаров («Nakonay Qarapaiym») әлеуметтік желіде азаматтарды заңсыз ойындарға тарту мақсатында агрессивті науқан жүргізіп, жарнама үшін 15,8 млн теңге алып, оның жартысына жуығын сол платформалардың өзінде ойнап ұтылып қалған.
«Өкінішке қарай, бұл істе қыздар да белсенді. Мәселен, Мариям Құлжабаева («@oomariko») интернет-казинода тіркелуге шақырған қарапайым стористерін 350 мың теңгеге бағалаған. Ал оның құрбаны болған отбасылар миллиондаған қаржысынан айырылып отыр. Сондай-ақ Зухра Хакиева, Диана Халметова, Әсем Аубакирова, Арина Байкова, Күмісай Айымбетова және басқа да блогерлерді атауға болады», — делінген хабарламада.
Блогерлер онлайн-казиноға жарнама жасауды жалғастырып жатыр. Қанша жерден айыппұл төлесе де, заңсыз әрекеттерін тоқтатпайды.
Қаржылық мониторинг агенттігі бұл істерді ҚР ҚК 28-бабының 5-тармағы аясында («заңсыз ойын бизнесіне көмектесу») қарастыруды ұсынды. Сонымен қатар қаржы пирамидаларын жарнамалағандай, онлайн-казино жарнамасы үшін де қылмыстық жауапкершілік енгізуге бастама көтерген.
Еске салсақ, былтыр Туризм және спорт министрлігінің ойын бизнесін және лотереяны реттеу комитеті лицензиясы жоқ интернет-ресурстар тізімін жаңартқан еді. Тізімге тыйым салынған интернет-казино белгілері бар 1 820 бірегей желілік мекенжай енген.
Сондай-ақ Қазақстанда онлайн-казиноларды қаржыландыруға арналған 50-ден астам банк шоты бұғатталды.
Фото: Freepik.com
