Туризм және спорт министрлігінің Ойын бизнесін және лотереяны реттеу комитеті лицензиясы жоқ интернет-ресурстар тізімін жаңартты.
Тізімге ҚР Заңының 6-бабының 2-тармағында тыйым салынған интернет-казино белгілері бар 1 820 бірегей желілік мекенжай енген.
Айтып өтелік, бұл тізім комитеттің жүйелі ақпарат жинап, интернет-казино мен заңсыз букмекерлік қызметтердің жұмысын анықтағаны нәтижесінде жасалып отыр.
Сонымен қатар тізім Telegram және WhatsApp мессенджерлерінен толықтырылып отырады.
«Заңсыз ойын бизнесінің таралуына бейжай қарамайтын азаматтар күдікті сайттар мен әлеуметтік желілердегі парақшалардың сілтемелерін жібереді. Тізімге Vavada, Sultan Games, Pin Up, Play Fortuna, Riobet, Casino-X секілді танымал платформалар да енгізілген.
Анықталған ақпарат «Кибернадзор» ақпараттық жүйесіне енгізіліп, Қазақстан Республикасының аумағында қызметін шектеу үшін заң тұрғысынан бағалау жүргізіледі», — деп хабарлады комитет.
Еске салсақ, күздің басында Үкіметтің Туризм және спорт министрлігінің кейбір мәселелері туралы қаулысы бекітілді. Құжатқа сәйкес, Туризм индустриясы комитеті оның құрамынан Туризм және спорт министрлігінің Ойын бизнесін және лотереяларды реттеу комитетін бөлу арқылы қайта құрылды. Жаңа комитет салалық мәселелерді дербес және жедел шеше алады.
Сурет: Туризм және спорт министрлігі
