«Қазақмыс» корпорациясы экс-президент Нұрсұлтан Назарбаевқа ұшақ сатып алуға қатысты ақпаратты жоққа шығарды.
«Бірқатар БАҚ пен әлеуметтік желілерде «Қазақмыс» корпорациясы Қазақстанның тұңғыш президентіне ұшақ сатып алыпты-мыс деген ақпараттың таралуына байланысты ресми түрде бұл ақпарат шындыққа жанаспайтынын мәлімдейміз», — делінген хабарламада.
Корпорация мұндай ақпараттың негізсіз екенін, әуе кемесі компанияның өндірістік қажеттіліктері үшін алынатынын мәлімдеген.
«Қазақмыс» корпорациясы ешбір жеке тұлғаға әуе кемесін сатып әперген жоқ», — делінген.
Ақпарат қайдан пайда болды?
2025 жылы 3 ақпанда Бәсе YouTube-арнасында «Қазақмыс” корпорациясының 83 миллион долларға Airbus ACJ220-110 бизнес-джет сатып алғаны айтылады. Арна ұшақтың экс-президент үшін сатып алынғанын мәлімдеді.
18 адамға арналған әуе кемесінің көлемі 73 шаршы метр. Лайнер корпорацияның балансына 2024 жылдың қазан айында қосылған.
Естеріңізге сала кетейік, былтыр 17-18 желтоқсанда «Қазақмыс корпорациясына» қарасты бірқатар кеніште ереуіл болған еді.
Ереуілшілердің негізгі талаптары – жалақыны халықаралық нарықта мыс бағасының өсуі, доллар бағамының көтерілуі, азық-түлік пен коммуналдық қызметтердің қымбаттауы аясында 30%-ға көтеру. Сондай-ақ, жаңа талаптар ретінде жалақыны 100%-ға арттыру және мемлекеттік органдар тарапынан қысымды төмендету болды.
Сурет: kazakhmys.kz
