Елімізде онкологиялық ауруларды емдеуге бөлінетін қаржы қысқартылмайды. Керісінше, аталған салаға қосымша 25 млрд теңге бөлінеді. Бұл жөнінде мәжіліс депутаты Асхат Аймағамбетов айтты.
«Бюджет жобасында онкологияны емдеуге бөлінетін қаржыны 20 миллиард теңгеге, ал онкогематологияға 5 миллиард теңгеге қысқарту туралы ұсыныс болды. Алайда, біз бұл қысқартуға қатаң түрде қарсылық білдіріп, қосымша қаражат бөлу туралы түзету енгіздік. Денсаулық сақтау министрлігімен бірлескен жемісті жұмыстың арқасында онкологиялық науқастарды емдеуді қаржыландыру үшін қосымша 25 миллиард теңге бөлу туралы түзетуіміз қолдау тапты. Бұл – өте қуанышты және маңызды жаңалық», — деп жазды депутат.
Сондай-ақ, кешенді жоспар бекітіліп, мамандандырылған орталықтың құрылысы аяқталуға жақын екені белгілі болды.
«Сонымен қатар Ұлттық онкология орталығындағы протондық терапия орталығының құрылысын аяқтауға 4,2 миллиард теңге бөлу туралы ұсынысымыз да қабылданды. Қазіргі уақытта Орталық Азияда протондық терапия орталығы жоқ, сондықтан біздің пациенттер қымбат ем алу үшін шетелге баруға мәжбүр. Қазақстанда бұл орталық жыл сайын 300-ден астам науқасқа өмір сүруге мүмкіндік беріп, шетелде емделуге қажетті үлкен шығындардан босатады», — деді ол.
Былтыр Қазақстанда 41 мыңнан астам адамнан онкологиялық ауру анықталған
Былтыр еліміз бойынша 41 мыңнан астам адамнан онкологиялық ауру анықталды. Қазақстанда жалпы 218 мыңға жуық науқас диспансерлік есепте тұр. Бұл 2022 жылмен салыстырғанда 5,7%-ға көп дейді мамандар.
Ал бір жыл ішінде осы дерттен 13 мыңға жуық адам көз жұмған. Дәрігерлер дер кезінде қаралу арқылы дерттің қаупін азайтуға болатынын айтады.
Мамандардың ресми дерегіне сүйенсек, елде сүт безінің қатерлі ісігі көп кездеседі. Екінші орында – колоректальды рак тұр. Бұл – тоқ ішектің ауруы. Одан кейін өкпенің қатерлі ісігі жиі тіркеледі.
Сурет: freepik.com
